Бүгін Түркістан төрінде «TURKISTAN MEDIA» халықаралық орталығы мен «TURKISTAN» интеллектуалды клубы ашылды. Салтанатты шараға елімізбен қатар Түркия, Әзірбайжан, Татарстан және Қырғызстан республикаларының бұқаралық ақпарат құралдарының жетекшілері мен өкілдері қатысты.
Түркістан облысының әкімі Жансейіт Түймебаев жаңа орталықтың жұмысымен танысып, сәттілік тіледі. Аймақ басшысының айтуынша, бұл қадам Түркістанның Түркі әлемінің рухани әрі ақпараттық орталығына айналуына серпін береді.
Заман талабына сай Медиа орталықта брифинг және шағын кеңестер өткізетін орындар бар. Сондай-ақ, жаңа жиһаздармен, компьютерлермен және ғаламтормен толықтай қамтылған. Мұнда Түркістан облысының Өңірлік коммуникациялар қызметі, Түркістандағы Қ.А.Яссауи атындағы ХҚТУ-дың студенттерінен құралған ерікті жас журналистер клубы жұмыс істейді.
Орталықта қазақ тілінен бөлек 5 тілде ақпарат таратады. Атап айтқанда: түрік, әзірбайжан, орыс, өзбек және қырғыз тілінде. Алдағы уақытта ағылшын тілінде де ақпараттар ағынын тарату жоспарланып отыр. Ал кез-келген отандық және шетелдік тілшілер орталық арқылы өз ақпараттарын ақысыз тарату мүмкіндігіне ие болмақ. Өз кезегінде мұндай игі қадамдар Түркістан облысы мен Түркістан қаласының туристік әлеуетін жоғарылатып, инвестициялық тартымдылығын арттыра түсетіні анық.
Ал орталық жанынан ашылған клубта түрлі тақырыпта басқосулар, дөңгелек үстелдер мен ел руханиятына оң ықпал ететін жиындар өткізіліп тұрады.
Медиа орталықтың тұсауын қазақстандық және шетелдік БАҚ басшылары кесіп, ақжарма тілектерін арнады. Мұнда бүгін «TURKISTAN» интеллектуалды клубының алғашқы отырысы да өтті. Алғашқы спикерлері Түркістан облысының әкімі Ж.Түймебаев пен танымал публицистер өз ойларын ортаға салды.
