Қазақстан инженерлі-педагогикалық Халықтар достығы университетінің құрметті президенті, Жоғары ғылым академиясының академигі, Өзбекстан, Ресей, Нью-Йорк ғылым академиясының академигі, химия ғылымының докторы, П.Капица атындағы халықаралық сыйлықтың лауреаты, Оңтүстік Қазақстан облысының, Арыс, Сайрам аудандарының «Құрметті азаматы», ҚР Білім беру ісінің құрметті қызметкері, Қазақстан халқы ассамблеясының «Бірлік» және «А.Нобель» алтын медалінің, ОҚО сіңірген еңбегі үшін мерекелік медалінің иегері, Халықаралық Сократ комитеті Еуропалық бизнес ассамблеясының «The Name is Scinece» жүлдесінің иегері Әбдімұса Қуатбеков 76 жасында өмірден озды.
Әбдімұса Мұратұлы Қуатбеков 1942 жылы 4 маусымда Оңтүстік Қазақстан облысы Арыс ауданында дүниеге келген. 1960 жылы Ташкент мемлекеттік университетін, 1968 жылы Қазақстан ҒА-ның Химия ғылымдары институтының аспирантурасын тәмамдаған.
Химия ғылымының докторы (1995), профессор (1996), ҚР Жаратылыстану (1996) және Ресей педагогика және психология ғылымдары академияларының (1998) академигі.
50 жылдан астам ғұмырын химия саласының дамуына арнаған Әбдімұса Қуатбековтің қайырымдылық жұмыстары да көпшілікке үлгі боларлықтай. Жыл сайын жетім-жесірлерге, көп балалы отбасыдан шыққан жандарға, мүгедектерге, жағдайы төмен жүздеген ұл-қыздардың тегін білім алуына мүмкіндік жасап, гранттар мен стипендиялар тағайындап тұрды.
Талай шәкіртті қанатының астына басып тәрбиелеп, болашаққа қанаттандыра білген ел ағасының, қоғам қайраткерінің қайғысына ортақтасып, жақындарына көңіл айтамыз.
Әбдімұса Мұратұлын ақтық сапарға шығарып салу рәсімі 30 қазан күні 11:00-де Шымкент қаласы, Д.Қонаев гүлзарының бойы 58/1 үйде, қонақасы «Гранд Холидей» тойханасында сағат 14:00-де беріледі.
