Ербол Рахымбеков ҚР Президенті Нұрсұлтан Назарбаевтың 2018 жылғы 9 қазандағы №768 Жарлығына сәйкес Шымкент сотының Төрағасы болып тағайындалды.
«ҚР Конституциясының 82 б.2т., 2000 жылғы 25 желтоқсандағы «ҚР Сот жүйесі және судьялардың статусы туралы» ҚР Конституциялық заңының 31б.2,3,5 т.34б 3т.2)тт 1т. 1), 2), 11-1) тт сәйкес Шымкент қаласы сотының Төрағасы қызметіне Рахымбеков Ербол Мұхажанұлын тағайындау туралы қаулы етемін», — делінген құжатта.
Рахымбеков Ербол Мұхажанұлы 1964 жылы 14 қаңтарда дүниеге келген. 1989 жылы Қарағанды мемлекеттік университетін тәмамдап, заңгер мамандығына ие болды. Сот жүйесінде 1991 жылдан бастап халықтық судьяның міндетін атқарушы, халықтық судья, судья болып қызмет атқарған. Қазақстан Республикасы Президентінің 1996 жылғы 15 қарашадағы Жарлығымен Қарағанды облысының Нұра аудандық сотының төрағасы қызметіне тағайындалса, 2000-2010 жылдар аралығында Қарағанды облысының Октябрь аудандық сотының құрамындағы Киров сот учаскесінің аға судьясы, Октябрь ауданының № 3 аудандық сотының судьясы, Октябрь ауданының № 3 аудандық сотының төрағасы, Теміртау қалалық сотының төрағасы, Қарағанды қаласының Қазыбек би аудандық сотының төрағасы лауазымдары қызметінде болған. Қазақстан Республикасы Президентінің 2010 жылғы 9 қарашадағы Жарлығымен Солтүстік Қазақстан облыстық сотының апелляциялық сот алқасының төрағасы болып, Қазақстан Республикасы Президентінің 2012 жылғы 2 шілдедегі Жарлығымен Ербол Мұхажанұлы Рахымбеков қылмыстық істер жөніндегі апелляциялық сот алқасының төрағасы қызметіне тағайындалған. Қазақстан Республикасы Президентінің 2014 жылғы 17 маусымдағы Жарлығымен Ербол Мұхажанұлы Рахымбеков Астана қаласының қылмыстық істер жөніндегі мамандандырылған ауданаралық сотының төрағасы лауазымында болып, 2015 жылдың 10 желтоқсанынан бастап Қазақстан Республикасының Жоғарғы Сотының судьясы лауазымында тағайындалған. 2016 жылдан бастап жаңа тағайындауға дейін Қазақстан Республикасының Жоғарғы Сотында БАҚ-пен байланысты қамтамасыз ету бойынша судья-үйлестірушісі қызметін атқарған.
Айта кетейік, Ербол Рахымбеков 2014-2015 жылдары қылмыстық істер жөніндегі мамандандырылған ауданаралық сотының төрағасы қызметін атқарған жылдары резонансты қылмыстық істер туралы шешімдер қабылдады. Атап айтқанда, Табиғи монополияларды реттеу агенттігінің басшысы болған Мұрат Оспановтың ісі; бұрынғы ауыл шаруашылық вице-министрі Мүслім Өміряевтің ісі; елордалық кәсіпкер Қайрат Жамалиев («Әліби ісі»); өз әйелін өртеп жіберген Қанат Сәдуовтің ісі. Сонымен қатар, Ербол Рахымбеков Астанада 18 жастағы қызды өлтірген үш құрбыны ұзақ мерзімге соттады.
