Мемлекеттік-жекешелік әріптестік жобасы бойынша Сарыағаш ауданында балабақша пайдалануға берілді

Бүгін Түркістан облысының әкімі Жансейіт Түймебаев жұмыс сапарымен Сарыағаш ауданында болып, аудандағы 6 нысанды аралады. Ең алдымен өңір басшысы Жібек жолы ауылдық округінде орналасқан жеке кәсіпкер Г.Гуламованың «Бес Жұлдыз» балабақшасының жұмысымен танысты. Балабақшаға тартылған инвестиция көлемі 1,1 млрд теңге, жер көлемі 1,0 га, сыйымдылығы 450 бала. Балабақшада 60 адам тұрақты жұмыс жасап, 45-50 мың теңге жалақы алады.

Мұнан соң, облыс әкімі Қапланбек ауылдық округінде орналасқан «Жабай ата» шаруа қожалығының жылыжай кешенінің жұмысымен танысты. Бұл нысанның ерекшелігі озық технологияны қолдана отырып, тұрғындарды көкеніспен қамтамасыз ету болып табылады. Жобаның жалпы құны 1,8 млрд теңге. Жер көлемі 15,0 га, отырғызылған көшеттер саны 450 мың дана. Жылыжайдың 9,0 га — қызанақ, 6,0 га — қияр, егілген. Шаруа қожалықта тұрақты жұмыспен 75 адам қамтылып, 50 мың теңге жалақы алады.

Жұмыс сапары барысында өңір басшысы Қапланбек ауылдық округінде орналасқан «Қапланбек» спорт кешенінің жұмысымен танысты. Аумағы 0,70 га жерде орналасқан спорт кешенінде каратэ, таэквондо, ауыр атлетика, кіші футбол алаңдары бар. Онда жалпы 90 бала спортпен жаттығады. Спорт кешенде 7 адам тұрақты жұмыс жасап, орташа 55-60 мың теңге жалақы алады.

Сондай-ақ, Сарыағаш ауданы, Дарбаза ауылдық округінде орналасқан сыйымдылығы 75 балаға арналған «Ай-Мейірім» балабақшасының салтанатты ашылу рәсіміне қатысты. Балабақша мемлекеттік-жекеменшік әріптестік аясында салынған. Инвестиция көлемі 178 млн теңге, жер көлемі 30,0 га, тұрақты жұмыспен қамтылғандар 18 адам, орташа жалақы 45-50 мың теңге. Жалпы ауданда 203 балабақша, 7 мектеп жанындағы шағын орталықтар, 16 мемлекеттік балабақша, 180 жекеменшік балабақша бар.

Тоғжан Нарбай