Күш атасы Қажымұқанның рухына тағзым!

Күш атасы Қажымұқанның рухына тағзым!
Мəртөбеден бастау алған «Айғақ» телеарнасының түсірілім тобы Ордабасы ауданының тарихи орындарының бірі — күш атасы Қажымұқанның кесенесін де қамтыды.

Қажымұқан Мұңайтпасұлы күрес өнерінің бірнеше түрін жетік меңгерген, әлем чемпионы атағына қол жеткізген тұңғыш қазақ батыры. Заманында 54 мемлекетте додаға түсіп, 48 медаль олжалаған Қажымұқандай мықты XX ғасырдың басында түркі халықтарының ішінде қазақта ғана болыпты.

Қазақ халқының даңқты ұлы, классикалық күрес шебері, дүниежүзінің бірнеше мәрте чемпионы Қажымұқан Мұңайтпасұлының мол тарихи мұрасын насихаттау – бүгінгі ұрпақ парызы. Елбасының «Болашаққа бағдар: қоғамдық сананы жаңғырту» бағдарламалық мақаласында жалпыұлттық құндылықтарды нығайтудың қажеттілігі баса айтылған.Делегацияны Ордабасы ауданының əкімдігі мен аудан əкімінің міндетін атқарушы Ғ.Үсенбаев күтіп алды.

Баба рухына тағзым еткен түркістандық делегация Темірлан ауылында орналасқан мұражайда болып, тарихи құндылықтармен танысты.

Үш мыңнан астам жәдігері бар бұл мұражай Шымкенттен 40 шақырымдай жерде, «Батыс Қытай – Батыс Еуропа» автожолының бойында орналасқан. Туристерге әбден қолайлы.

2001 жылы халық демеушілігінің және күш атасына лайықты құрмет деп біліп жеке демеушілік еткен ел азаматтарының арқасында ұлттық нақышта салынған арнайы жаңа ғимарат еңсесін тіктеді. Бүгінде Қажымұқан атындағы облыстық спорт мұражайы мемлекеттік мекемесі болып құрылып облыс тұрғындарына кеңінен қызмет көрсетіп келеді.

«Айғақ-ақпарат»