Білім саласындағы сыбайлас жемқорлықтың алдын алу мәселелері талқыланды

«Білім беру саласындағы сыбайлас жемқорлыққа қарсы құралдар: жүзеге асыру және ұлттық заңнаманың ерекшеліктері» атты ғылыми-тәжірибиелік конференция Мемлекеттік қызмет істері және сыбайлас жемқорлыққа қарсы іс-қимыл Агенттігінің Шымкент қаласы бойынша департаментінің ұйымдастыруымен өткізіліп отыр. Мұндағы мақсат білім беру саласындағы сыбайлас жемқорлық әрекеттерінің алдын алуға бағытталған. Осы орайда департамент басшысы Әли Көмекбаевтың төрағалығымен өткен конференцияға Сыбайлас жемқорлыққа қарсы іс-қимыл ұлттық  бюросының Шымкент қаласы бойынша департамент басшысының орынбасары Камал Қабылбеков, білім саласындағы бақылау департаментінің басшысы Жанат Тәжиева сондай-ақ,  Шымкент қалалық білім басқармасына қарасты  колледждер мен  мектеп директорлары және  балабақша меңгерушілері қатысты. Конференция барысында белгілі болғандай салалық департаменттің сенім телефонына  2018 жылдың бірінші жартыжылдығында 70-ке жуық арыз шағымдар, өтініштер мен ұсыныстар келіп түссе, соның 40 пайыздан астамы білім саласына қатысты болған.

Бүгінгі іс-шараның мақсаты біреуді жазаға тарту емес, жемқорлық әрекеттердің алдын алу, екендігі түсіндіріліп, еліне жеріне патриот адал азаматтарды тәрбиелеуге бірлесе жұмыс жасауға шақырды. Осы орайда конференция барысында бірқатар баяндамалар жасалып нақты деректер мен дәйектер айтылды. Мәселен  «Жұмыспен қамту 2020 мемлекеттік  бағдарламасын қысқа мерзімді  кәсіптік білім беру бағыты бойынша  жүзеге асыру барысында  орын алған заңсыз әрекеттер де мәлім болды.

Конференция барысында Шымкент қаласының білім саласындағы бақылау департаментінің басшысы Ж.Тажиева да салада анықталған бірқатар кемшіліктер мен  заңбұзушылық әрекеттерге тоқталды.  Сонымен қатар  саладағы сыбайлас жемқорлықтың алдын алудағы тиімді бастамалардың бірі ретінде  білім мекемелерін аттестаттаудан өткізудің электронды жүйесі де әзірленіп жатқандығын жеткізді.

Жиын барысында  сыбайлас жемқорлыққа қарсы іс-қимыл департаментінің басшысы   Әли Амантайұлы Шымкент қаласы әкімінің өкімімен қалада мемлекеттік қызмет пен мемлекеттік басқару жүйесін жетілдіру бойынша арнайы комиссия құрылып отырғандығын жеткізді.  Аталған өкім аясында Шымкент қаласындағы мемлекеттік органдар, соның ішінде білім басқармасы да оңтайландырылатын болады.

Айта кету керек, сыбайлас жемқорлық деректері бойынша Агенттіктің 1424 кол орталығы, сонымен қатар азаматтармен тиімді кері байланыс орнату мақсатында департамент сайтында арнайы «Білім» айдары ашылып, қосымша вацап мессенджері жұмыс жасайды.

Абай Омар