Ішкі істер министрі қызметкерлерінің жұмысындағы кемшіліктерді атады

Қазақстанда 70 мыңға жуық маскүнем тіркеуге алынған. Бұл туралы бүгін Үкіметтің селекторлық режімдегі отырысында ҚР Ішкі істер министрі Қалмұханбет Қасымов айтты, деп хабарлайды ҚазАқпарат.

Министрдің айтуынша, бірқатар қылмыстардың алдын алуға бағытталған жұмыстарды жүргізу учаскелік полиция инспекторларының міндетіне жатады.

Алайда соңғы уақытта қылмыстың алдын алу жұмысында олардың рөлі төмендей түсуде. Бұл қызметтің мүмкіндіктерін әкімдер де әлі толық пайдаланбай отыр. «Учаскелік полиция инспекторларының маскүнемдікпен, алкоголизм профилактикасы бойынша жүргізіп жатқан жұмыстарының керекті нәтижесі байқалмайды. Ауыр қылмыстардың шамамен 60-70 пайызы көбінесе тұрмыстық салада маскүнемдер тарапынан жасалады. Қазіргі уақытта 70 мыңға жуық маскүнем полиция және денсаулық сақтау орындарының бақылауында»,- деді ол.

Оның сөзіне қарағанда, еліміздегі медициналық сауықтыру және алкоголизмнен емдеу орталықтарының саны жетіспейді. Өткен жылы осы ұйымдарға 5 300 адам жіберілген.

Соның бір мыңнан астамы емдеуден өтпеген. «Себебі төсек-орындар жетіспейді. Учаскелік инспекторлар қолайсыз отбасылармен нақты жұмыстар жүргізбейді. Осыған байланысты бұл салада ауыр қылмыс азаймай жатыр. Әрине учаскелік инспекторлардың қызметінде кемшіліктер бар.