Биыл жұмыспен қамту орталықтарына 11 мың мүгедек жаннан өтініш түскен

Жыл басынан бері еліміздегі жұмыспен қамту орталықтарына 11 мыңға жуық мүмкіндігі шектеулі жаннан өтініш келіп түскен.

Алайда екі қолға бір күрек іздегендердің 3-тен бірі, яғни 3525-сі ғана уақытша қызмет түрлерімен қамтылды.

Бұл туралы бүгін Еңбек және халықты әлеуметтік қорғау министрі мәлімдеді.

Мүгедектерді әлеуметтік қорғау туралы заңның жүзеге асу барысын баяндаған Мәдина Әбілқасымова елімізде еңбекке жарамды 411 мың мүмкіндігі шектеулі азаматтың бар екенін айтты. Олардың 128 мыңы қызметкер ретінде тіркелген.

Айта кетейік, биылдан бастап, мемлекет арнайы жұмыс орындарын ашқан мекеме мен ұйымдардың шығынын субсидиялауды қолға алды. 2018 жылы осы мақсатқа қазынадан 105 миллион теңге бөлінген.

Алайда бұл қаражаттың тек 18 миллионы жұмсалып, бар болғаны 72 орын ашылыпты. Министр бұл көрсеткішті арттыру үшін еліміздің 4 өңірінде пилоттық жобаның жүзеге асып жатқанын жеткізді.

Мәдина Әбілқасымова ҚР Еңбек және халықты әлеуметтік қорғау министрі: — Осы жаңа механизм өтініш берушінің құжаттар пакетімен түрлі мекемелерге кезекке тұрып жүгінуін алып тастауға мүмкіндік береді.

Оның орнына азаматтар жеке өздері бармай, медициналық деректер негізінде сырттай куәландырудан өтеді.

Осы пилот қазір Қарағанды, Қостанай, Ақмола, Батыс Қазақстан әске асырылып жатыр. Қалған өңірлерде 2019 жылдан бастап жүзеге асырамыз.
24.kz