Облыс орталығы Түркістан қаласында өңір басшысы Жансейіт Түймебаевтың қатысуымен Қоғамдық Кеңес отырысы өтіп жатыр. Күн тәртібінде жеті бірдей мәселені қамтыған жиында «Түркістан облысы, Түркістан қаласының дамуы туралы» Жансейіт Қансейітұлы баяндап берді. Түркістан облысы әкімдігінің рухани астанаға көшкенініне бүгін тура бір ай толды. 2117 мемлекеттік қызметкер осында көшіп келген. Облыс әкімінің баяндамасына сүйенсек, жыл соңына дейін мұнда 42 көпқабатты тұрғын үйдің құрылыс жұмыстары басталады. Түркістан қаласының жер көлемі 25 мың гектарға ұлғаймақ. Қожа Ахмет Ясауи кесенесінің маңында шығыс стилінде ғимараттар салынады. Жалпы жер көлемі 88 гектарды құрайды.
Айта кетейік, Түркістан облысының әкімі Жансейіт Түймебаев ағымдағы жылы қыркүйектің төртінші жұлдызында облыстық, аудандық, қалалық мәслихат депутаттарымен және іскер азаматтармен кездесіп, облыс орталығы – Түркістан қаласын дамытуға жасалған жобалардың барысымен таныстырған болатын. Өңір басшысы Елбасының Түркістанды түлетуге аса назар аударып, оған республикалық бюджеттен бөлек, еліміздің өзге өңірлерін, ұлттық компаниялар мен бизнес өкілдерін атсалысуға шақырғанын атап өтті. Болашақта Қазақстанның ғана емес, бүкіл Түркі жұртының рухани-мәдени орталығына айналуы тиіс. Түркістанның ескі және жаңа келбетінен халық қалаулыларына фильм көрсетіліп, іскер азаматтарды шаһарды көркейтуде түрлі әлеуметтік нысандар мен ойын-сауық орталықтары сынды халыққа қажетті ғимаратты салуға шақырған еді. Осы жиында айтылған маңызды мәселелер Қоғамдық Кеңес отырысында да кеңінен таныстырылды.
Жаңа облыс орталығы — Түркістанда белгілі кәсіпкер, облыстық мәслихат депутаты Серікжан Сейітжанов «Rixos» бес жұлдызды қонақ үйі сияқты мейманхана салуды бастап кетсе, түріктің іскер азаматы да бес жұлдызды екінші қонақ үйді тұрғызудың жобасын түзіп қойған. Ал облыстық мәслихаттың хатшысы, кәсіпкер Қайрат Балабиев спорт фитнес орталығын салуды ұйғарып қойған. Мұнан бөлек, бірқатар іскер азаматтар өзге де әлеуметтік, мәдени нысандарды салуға ниеттеніп отыр.
Жомарт Бегімбет
