Шымкентте «Седжонг» корей білім беру орталығы ашылды

Алғаш рет  М.Әуезов атындағы Оңтүстік Қазақстан мемлекеттік университетінде «Седжонг» корей білім беру орталығы ашылды. Оқу орталығы бүгінге дейін еліміздің Астана, Алматы, Талдықорған сияқты ірі  қалаларында жұмыс жасап келген. Енді міне, тікелей «Седжонг»  институты  қорымен қаржыландырылатын  Қазақстандағы үшінші корейлік  білім беру орталығы үшінші мегаполисте жүйелі түрде жұмысын бастамақ. Осыған орай Корея Республикасының Қазақстандағы төтенше және өкілетті елшісі Кима Дэси және Оңтүстік Кореядан келген делегацияның қатысуымен басқосу ұйымдастырылды.

Корей білім беру орталығының негізгі мақсаты- корей тілін үйрену бойынша тілдік курстар ұйымдастыру. Осыған орай, екі елдің  педагог мамандары ғылыми – зерттеулер мен тәжірибелік жобалар  бойынша пікір алмасты. Қаламызда жаңадан жұмысын бастағалы отырған оқу орталығы университет  ұстаздары мен студенттер үшін тегін білім берсе, корей тілін үйренуге  ниет білдіргендер   үшін ақылы болмақ.

«Седжонг» институты 2007  жылы құрылып, үш елдің 13 мектебінде дами бастаған. Бүгінгі таңда  11 жылдың  ішінде 54 елдегі 131 мектептің қатысуымен ең ірі корей білім беру ұйымына айналып отыр. Ал Шымкентте  жұмысын бастағалы отырған корей оқу орталығына білім алуға ниет білдірушілердің қатары көп. Әсіресе жастар. Айтуларынша, корей тілін үйрену еліміздің дамыған 30 елдің қатарына енуге өз септігін тигізеді.

Екі тараптың кездесуі  барысында оқу орталығының ғалымдары тоқыма және азық-түлік өнеркәсібі, құрылыс материалдары, биотехнология және экология саласындағы ғылыми және техникалық жобаларды ұсынды. «Өзге тілдің бәрін біл, өз тіліңді құрметте». Ендігі  жерде корей тілін меңгеруге ниеттенгендер М.Әуезов атындағы Оңтүстік Қазақстан мемлекеттік университетіндегі  «Седжонг» корей білім беру орталығына келсе болады!

Мақсат Тоқсанбай