Түркістан облысы ұстаздарының дәстүрлі Тамыз конференциясы өтті. Конференцияда жылдық жоспардың орындалуы, өткен жылдың қорытындысы мен жаңа оқу жылына дайындық барысы талқыланған. Бұл жиынның басты ерекшелігі — мұғалімдердің рухани астан, жаңа облыс орталығында жиналуы болды. Облыс әкімі Жансейіт Түймебаевтың алқалы жиындағы пікірлері көпшілікке терең ой салды.
Бұл жиынға аудандық және қалалық білім бөлімдерінің басшылары, ұстаздар, білім саласының ардагерлері, облыстық мәслихат депуттаттары және облыс басшысы Жансейіт Түймебаев қатысты. Ең алдымен облыстағы аудан, қалалардағы мектептердің жыл бойғы атқарған жұмыстары мен жетістіктері паш етілген интерактивті тақталы көрмені тамашалады.
Еліміздегі ең өзекті мәселелердің бірі – білім саласы. Ол қашан да қоғамымызда айтыла беретін тақырып. Себебі халқымыздың жарқын болашағы тікелей білімді азаматтарға тәуелді екені жасырын емес. Ал биылғы жылы өңірдің білім беру саласына 262 млрд. 24 млн. теңге қаралып, қаржы көлемі 2017 жылмен салыстырғанда 6 млрд. 15 млн. теңгеге ұлғайған. Сондай- ақ, облыс бойынша бірінші сыныпқа 55385 оқушы барады. Яғни, мектепке келетін оқушы саны 19 мыңға артып отыр. Бұл туралы Түркістан облыстық білім басқармасының басшысы Исатай Сағындықов өз баяндамасында мәлімдеді.
Білім беру саласындағы жетістіктерді саралап болған соң, аталған саладағы мәселерге де тоқталды. Сапалы білім беру жайттары мен суицид, өзге де проблемалар назардан тыс қалған жоқ. Бұдан өзге білім беру саласындағы ізденістер мен жаңа міндеттер, «Рухани жаңғыру» бағдарламасы бойынша қолға алынған жұмыстар туралы сала мамандары баяндама жасаса, жастар жағы да жарысып шығып, өз ұсыныстарын жеткізді.
Елбасымыз Нұрсұлтан Назарбаевтың Жолдауында білім берудің сапасын жаңашаландыру жөнінде айтылған болатын. Жоғары сападағы оқытуда мүлде жаңа бағдарламалар, оқулықтар, стандарттар және кадрлар болатыны да шетте қалмаған. Елбасымыздың осы Үндеуін Түркістан облысының әкімі Жансейіт Түймебаев та жаңғыртуда. Білім саласының басты назарда болып, мұғалімдердің сапалы қызмет көтеруін ескертті.
