«Мәңгілік ел» пойызы Оңтүстікке келіп жетті. Республикалық акция аясында Түркістан қаласына табан тірген топ құрамын өңір тұрғындары сән-салтанатымен қарсы алды. Тәңсәріден теміржол вокзалы ән мен жырға бөленді.
Еліміздің көптеген қалалары мен елдімекендерін аралап келген қонақтарды оңтүстік жұрты ыстық ықыласпен күтіп алса, пойыз мүшелері шараның маңыздылығын түсіндірді. Мұнан кейін топ мүшелері Халыққа қызмет көрсету орталығына ат басын бұрды. Орталыққа келген азаматтарға әлеуметтік мәселелер мен жылжымайтын мүлік және заңды тұлғаларды тіркеу туралы тегін кеңестер айтылды. Сонымен қатар, делегация құрамындағы мамандар Түркістан қалалық емханасында да болып, 20 – дан астам қызмет түрін көрсетті. Білікті дәрігерлер тұрғындарға пайдалы кеңестерден бөлек, республикалық ауруханаларға тегін жолдама берді. Республикалық акция аясында қала тұрғындары орта және кіші кәсіпкерлікті дамыту бағдарламалары бойынша да көптеген сұрақтарына жауап алды.
«Мәңгілік ел» идеясын насихаттаған қонақтар сонымен бірге Қожа Ахмет Ясауи атындағы Халықаралық Қазақ Түрік Университетіне арнайы барып, жастармен кездесті. Жиын барысында аймақтың экологиялық мәселелері көтерілді. Қазақстан Тәуелсіздігінің 25 жылдығына арналған «Мәңгілік ел» пойызы барысында киелі шаһарға келген қонақтар жиналған көпшілікке Тәуелсіздік жылдарындағы еліміздің жеткен жетістіктеріне айрықша тоқталды. Елбасының «Қазақстан жаңа жаһандық нақты ахуалда: өсім, реформалар, даму» атты Жолдауы мен Ұлт жоспарындағы алға қойған міндеттер әңгіме арқауына айналды.
Осы күннің ертесіне, яғни дүйсенбіде әлеуметтік пойыз Шымкентке аялдады. Тәуелсіздік жылдарындағы жетістіктерін айшықтайтын әлеуметтік пойызда мәдениет және спорт қайраткерлері, Қазақстан халқы Ассамблеясы, мемлекеттік органдар мен ұйымдарының өкілдері және әртістер бар. Шырайлы шаһарға тоқтаған «Мәңгілік Ел» пойыз жолаушыларын қала басшысы Ғ.Әбдірахымов қарсы алды. 
Аталған пойыздың мүшелері бір күн бойына тұрғындарға медициналық, әлеуметтік мәселелер мен мемлекеттік қызмет көрсету бойынша, бизнес және кәсіпкерлік кеңестер беріп, кешке «Түркістан» сарайында Қазақстан Республикасы Тәуелсіздігінің 25 жылдығына арналған концертпен ұласты.
Жалпы «Мәңгілік ел» пойызы еліміз бойынша 33 шалғай елдімекенді аралап, 33 күн бойы аялдайтын болады. Мұндағы мақсат, Қазақстанның 25 жыл ішінде жеткен жетістіктерін айшықтап, халықтардың бірлігін нығайту. Қоғамды мемлекет басшысының бейбітшілік пен келісім саясатының айналасына біріктіру.
Ерлан Отарбаев
