2017 жылы «Нұрлы жер» бағдарламасы арқылы 11,2 млн шаршы метр тұрғын үй пайдалануға берілді. Өңірлерде баспананы қолданысқа беру бойынша Батыс Қазақстан, Оңтүстік және Қостанай облысы алда келеді, деп хабарлайды Baq.kz ақпарат агенттігі.
Биыл «Нұрлы жер» бағдарламасының басталғанына 1 жыл болды. Осы уақыт аралығында Елбасы ұсынған жоба арқылы 100 мың 812 баспана пайдалануға берілді. Оның 72 мың 904-і көпқабатты, ал қалған 27 мың 908-і жеке үйлер. Өңірлерде баспананы қолданысқа беру бойынша 42,4 пайызбен Батыс Қазақстан, 36,2 пайызбен Оңтүстік және Қостанай облысы 35,6 пайызбен алда келеді.
Аталған бағдарламаның бірінші бағыты бойынша, өңірлерде сатып алу құқығынсыз жалға берілетін жалпы алаңы 288 мың шаршы метр болатын тұрғын үйлердің құрылысы жүріп жатыр. Бұл шамамен 5 376 пәтер. Өткен жылдың 12 айында халықтың әлеуметтік әлсіз топтарына 2 620 баспана берілген. Жоспар бойынша аталған жұмыстар 2019 жылға дейін аяқталады. Бұл ретте республикалық бюджеттен 25 млрд теңге бөлініп отыр.
Сонымен қатар, «Нұрлы жер» бағдарламасы аясында тұрғын үй құрылысы жүріп жатқан аудандарға, соның ішінде жеке тұрғын үй салынып жатқан жерлерге инженерлік коммуникация тарту шаралары да атқарылуда. Қазіргі уақытта 70,3 мың учаскеде желі тарту жұмыстары жүргізіліп жатыр.
Бағдарламаның үшінші бағыты аясында, яғни, кредиттік тұрғын үй құрылысы бойынша елімізде 16 мың 217 пәтер қолданысқа берілді.
Ал жеке құрылыс салушыларды ынталандыру үшін екінші деңгейлі банктер оларға 2017-2018 жылдары 152 млрд теңге займ береді. Бұл сомаға жеке құрылыс салушылар 600 мың шаршы метр тұрғын үй салулары керек.
Ипотекалық несие берудің қолжетімділігін жоғарылату мақсатында «Нұрлы жер» бағдарламасы арқылы 120 млрд теңгеге 8 мың займ беру жоспарланған. 2017 жылы жалпы сомасы 13,4 млрд теңге болатын 1,3 мың займ берілген. Ал биылғы мақсат — жалпы сомасы 106,6 млрд теңге болатын 6,7 мың займ беру.
Биыл аталған бағдарлама аясында тағы да 100 мың пәтер пайдалануға беріледі деп жоспарланып отыр.
