АҚШ-тың Нью-Йорк қаласында 35 мыңға жуық полицей қызмет атқарады. Ірі мегаполисте 10 млннан аса тұрғын бар. Халқы тығыз орналасқан қалада тәртіп сақшысы қызметін атқару оңай шаруа емес, әрине. Ал сол ортада жүріп, ең үздік атану қиынның қиыны десе болады. Алайда 13 жасында теңіз асып Америкаға барған қазақ жігіті Димаш Ниязов бұл белесті бағындыра білді. Ол кәсіпқой бокста да әлемнің назарын өзіне аударып, жеңіліссіз қадам басып келеді. Айта берсең, ауыз толтыруға болатын жетістігі бар Димаш негізі Қазығұрт ауданында дүниеге келген.Туған жерінен жырақта жүрсе де ,араға 15-жыл салып үздік полицей жерлестерімен жүздесуге мүмкіндік алды. Тыста жүрсе де ,туған жерін тұғырым деп білетін азаматтың бұл ең қуанышты сәті болды. Жерлестермен жүздесу, ағайынмен қауышу арманым болатын дейді — Димаш Ниязов. «Алыстан алты жасар бала келсе, алпыстағы ақсақал сәлем береді». Қазығұрттың қариялары да шет елде қанатын қатайтып, баспалдағын мығымдай білген азаматты ыстық ықыласпен қарсы алды. Жүрек жарды тілектерін жеткізіп, ақ батасын берді.
Қазығұрт ауданының әкімдігі де елім деп келген ер азаматына сый- құрметін көрсетті. Туған жерінің тарихын білу әрбір қазақ баласының отан алдындағы парызы. Бұл тұрғыда Димаш Ниязовқа тапсырылған естелікте елдік мүдденің марапаты іспетті.
Мақсатқа жету үшін- талма, талпына біл. Оның өмірдегі ұстанымы да, ұраны да осы.Нью-Йорк қаласында тәртіп сақшысының үздігі атанып , кәсіпқой спортта талай сыннан сүрінбей өткен азаматтың өмірі жас ұрпақ үшін өнеге. Мәдениет үйінде өткен кездесуде көкейінде жүрген сауалдарын қоюға асыққан жастардың қатары да көп болды. Туып өскен өлкенің қонақжайлылығы мен жерлестерінің қызығушылығы Димаш Ниязовқа ерекше әсер қалдырды.
