Елбасының кәсіпкерлікті қолдау және дамытуға байланысты саясатын іске асыру мақсатында 2009 жылы өңірімізде «Оңтүстік» аймақтық инвестициялық орталығы құрылған болатын. Негізгі міндеті азаматтардың өз кәсібін ашуға септігін тигізіп, бизнес жобаларды қаржылай қолдау болып табылады. Яғни төмен пайызбен несие беру арқылы жұмыс жасайтын мекеме 2009-2017 жылдар аралығында 52,2 млрд. теңгені құрайтын 16 мың 679 жобаны қаржыландырған. Міне осының нәтижесінде 41 мың 500 ден астам жұмыс орындары ашылған.
«Оңтүстік» АИО 2009 жылдан бастап инвестициялық жобаларды жеңілдетілген қаржыландырумен айналысып келеді. Қаржы орталығы қызметінің негізгі бағыты –өңір кәсіпкерлерін несие және лизинг беру арқылы қаржыландыру болып табылады. Сондай – ақ жергілікті атқарушы органның қаржылық операторы ретінде аталмыш мекеме өзінің несие саясаты арқылы шағын және орта бизнестің толыққанды дамуына, сондай-ақ, жаңа кәсіпорындар мен жаңа жұмыс орындарының ашылуына септігін тигізіп отыр. Осылай деген «Оңтүстік» АИО ның басқарма төрағасы Қуаныш Байтөре 2017 жылы жалпы құны 8,3 млрд. теңгені құрайтын 2 342 жоба несиелендірілгенін айтады. Нәтижесінде АИО қаржыландыру сомасы өткен жылмен салыстырғанда 11% пайызға, жобалар саны 15,7%, және мемлекетке салық төлеу бойынша көрсеткіштер 13,4% ұлғайған.
Бұл орталық қазіргі таңда ауыл шаруашылығы өндірістік кооперативтерін қаржыландырумен де айналысады. Ол үшін кооперативтерге арнайы жеңілдетілген, қаржыландыру механизмі де жасалынған. Айталық 2017 жылы «Оңтүстік» АИО және оның еншілес мекемесі «Ырыс» микроқаржы ұйымымен бірлесе отырып жалпы саны 38 кооперативті несиелендірген бұл бағыт бойынша жұмсалған қаржы көлемі 969,2 млн. теңгені құрайды. Сонымен бірге орталық биыл алғаш рет 18 бен 29 жас аралығындағы жастарға кепілдіксіз 2 милион тенгеге дейін 7 пайыздық несие беру жобасын жүзеге асырмақ. Бұл бірінші кезекте жастардың өз кәсібін ашуларына мүмкіндік беретін болады.
«Оңтүстік» АИО-ның еншілес мекемесі «Ырыс» микроқаржы ұйымы да шағын кәсіпкерлік жобаларын қаржыландырумен айналысады. Өткен жылы несиелендірілген 2300 ден астам жобаның басым бөлігі нақ осы ұйым арқылы жүзеге асырылған. Микроқаржы ұйымы жергілікті бюджет есебінен бөлінген қаражаттан бөлек басқа да қаржы институттары арқылы әр түрлі бағдарламалар аясында қаражат тартып үстемесі 7 пайыздан аспайтын несие ретінде кәсіпкерлерге үлестіреді. Айталық былтыр бұл «Ырыс» микроқаржы ұйымы тек «Жұсыспен қамту 2020» жол картасы бағдарламасы бойынша жобалық құны 2 млрд 264 млн тенгені құрайтын 851 жобаны несиелендірген. «Ырыс» микроқаржы ұйымы соңғы жылдары егін шаруашылығымен айналысушыларға да төмен пайыздық несие беру бағыты бойынша жұмыс жасауда.
