Шымкенттегі екі нысанда жеделсаты іске қосылды

Өткен жылдың соңында Шымкент қаласының әкімі Ғабидолла Әбдірахымов қалаға қосылған елді мекендердің мәселелерімен танысу үшін Әл-Фараби ауданы тұрғындарымен кездескен болатын. Сонда жергілікті тұрғындар Терешкова-Быковский көшесі бойында орналасқан көпқабатты тұрғын үйде ұзақ жылдар бойы лифт істемей тұрғандығын айтқан еді. Осыған орай шаһар басшысы қала әкімінің орынбасары Бейсенбек Жанбосыновқа тез арада аталған тұрғын үй кешеніне лифт орнату туралы тапсырма берген. Нәтижесінде, уәде еткендей бір ай уақыт ішінде сол көпқабатты тұрғын үйлерге жеделсаты орнатылды. Тұрғындар мұнан былай техника көмегімен жоғары-төмен еш қиналмай шығып-түсетіндігін айтып, қала басшысына алғысын білдірді. Айта кетерлігі, бұл лифттер жергілікті бюджеттен емес, кәсіпкерлердің есебінен орнатылуда. Жоспарға сай осы жылы шаһардағы көптеген ғимараттарға лифт орнату көзделуде. Өткен жылы шаһардағы 18 мөлтекауданына қарасты Т.Рысқұлов көшесіндегі «Еуразия» базарының жанындағы жаяу жүргіншілерге арналған жерүсті өткелі пайдалануға берілген еді. Сол кезде тұрғындар көпірге шығып-түсудің қиындығын айтып шағымданған. Тұрғындардың талап — тілегін ескерген қала әкімдігі көпірге шығып-түсетін лифт орнатып, іске қосты. Жаңа нысанды арнайы барып көрген шаһар басшысы Ғабидолла Әбдірахымов алдағы уақытта мұндай жобалардың қала көшелерінде көптеп салынатынын айтты. «Бұл мүмкіндігі шектеулі азаматтар мен қариялар үшін жақсы жаңалық болды»,- дейді тұрғындар. Қазіргі таңда, қалалық жолаушылар көлігі және автомобиль жолдары бөлімінің тапсырысымен қаладағы Темірлан тас жолы – Мангельдин көшелерінің қиылысында тағы осындай жерүсті жаяу жүргіншілер өткелінің құрылыс жұмыстары жүргізілде.