Әл-Фараби ауданының әкімі жыл жұмысын қорытындылады

Шәмші Қалдаяқов атындағы облыстық филармонияда Әл-Фараби ауданының әкімі Бауыржан Қалжанов шаһар басшысы Ғабидолла Әбдірахымовтың алдында аудан тұрғындарымен кездесіп, бір жылда атқарған жұмыстарымен таныстырды. Қазіргі таңда Әл-Фараби ауданында 156 мың тұрғын, 14 елдімекен бар. Қала орталығында орналасқандықтан мұнда халыққа күнделікті қажетті инфрақұрылым мәселесі толық дерлік шешілген деуге болады. Дегенмен, бүгінгі кездесуге келген тұрғындар аудан әкіміне қала ішіндегі көлік қозғалысы, ретсіз сауда, ойын алаңшаларының жоқтығы, автотұрақтардың талаптарға сай емес екендігін айтып өтті. Естеріңізге салар болсақ, қала аумағына қосылған елді мекендер санының артуына орай жаңадан Қаратау ауданының құрылуына байланысты бұл ауданда халық саны да, аумағы да әлдеқайда кеміген болатын. Ауданда атқарылған жұмыстар да аз емес.Атап айтар болсақ, Әл-Фараби ауданы аумағында жылу қабылдайтын 609 көпқабатты тұрғын үй тіркелген. 2015-2016 жылдары жылу маусымында ауданның солтүстік аймағында «3-Энергоорталық» АҚ арқылы 251 үй, ал оңтүстік аймақта «Қуатжылуорталық-3» МКК арқылы 358 үй жылу алуда. Көпқабатты тұрғын үйлердің келбетін, тазалығын және жылуын сақтау мақсатында жұмыстар жүргізіліп, нәтижесінде 118 жұмыс істемейтін тік құбыр анықталып, барлық 118 тікқұбырлар ауыстырылды, 74 кіреберіс алаңдарының есігі, 645 шаршы метр фрамугалар тұрғындардың өз күштерімен орнатылды. Сонымен қатар, жылу энергиясын үнемдеу мақсатында аудан тұрғындарына жылу есептегіш құралының тиімділігі туралы түсіндіру жұмыстары жүргізіліп, 8 көпқабатты тұрғын үйге жылу есептегіш құралы орнатылды.  «Өңірлерді дамытудың 2020 жылға дейінгі» бағдарламасы шеңберінде, Әл-Фараби ауданында 2015 жылы күрделі жөндеу жұмыстарын жүргізу үшін белгіленген 30 көпқабатты тұрғын үйдің 13 көпқабатты тұрғын үйге күрделі жөндеу жұмыстарына қаржы бөлініп, жаңғырту жұмыстары жүргізілуде. Атап айтқанда, Молдағұлова №7, Республика даңғылы №19, 25 «А», 31, Быковский көшесі №2, №5, Володарский көшесі №2а, 2б, 2в, Майлы қожа көшесі №13, Байтұрсынов көшесі №9, Жангельдин көшесі №22 А, Верещагин көшесі №73 А. Сонымен қатар, 2016 жылы 12 көпқабатты тұрғын үйлерге күрделі жөндеу жұмыстарын жүргізу жоспарланып отыр.Екі сағатқа созылған кездесуде аудан әкімі өткен жылы жасаған тірліктері мен алдағы жоспарын тізбектеп берді. Әкімнің баяндамасын тыңдап, көкейдегі сауалдарын қойған көпшілік атқарылған жұмысқа қанағаттанарлық деген баға берді.