Қасиетті жұма күні Шымкент қаласынан шыққан «Ұлы дала автокеруені» Астанаға келіп жетті. Елбасының «Болашаққа бағдар: рухани жаңғыру» атты бағдарламалық мақаласында көрсетілген «Туған жер» бағдарламасын кеңінен насихаттау мақсатында «Айғақ» телеарнасы Оңтүстік Қазақстан облысының әкімі Жансейіт Түймебаевтың қолдауымен еліміздің бас қаласына «Ұлы дала автокеруені» сапарға аттанған болатын. Қоғамдық делегация құрамында Оңтүстік Қазақстан облысының Құрметті азаматы Молдабай Ильясов, Қазығұрт аудандық Қоғамдық Кеңесінің мүшесі Мұхтар Момынов, Қазақстанның мәдениет қайраткері Нышан Төлегенов, Ордабасы ауданының Құрметті азаматы Рымкүл Ертаева, «Нұр Отан» Партиясы Ордабасы аудандық филиалының төрағасы Бостандық Жакей, Арыс қаласының Құрметті азаматы, Қоғамдық Кеңестің мүшесі, «Ырыс алды-ынтымақ» ұйымының аудандағы төрағасы Балқыбеков Қонысбек және аудандық әкімдіктің бөлім басшылары, мектеп директорлары мен белсенді жастар, телеарнаның шығармашылық тобынан құралған 30 – дан астам адам бар.
Олар сапар аясында Оңтүстіктегі бірқатар киелі және тарихи орындарға аялдап, ата-баба рухына құран бағыштады. Қызылорда, Жезқазған, Қарағанды қалаларын басып өтіп, 2000-мыңға жуық шақырым жолды жүріп өткен автокеруен 2-қыркүйек күні түнде елордамызға табан тіреді.
Бүгін, яғни 3- қыркүйек күн «Астана ЭКСПО-2017″ Халықаралық көрмесінде Оңтүстік Қазақстан облысы күндерінің жабылуы. Осылайша елдік шараға үн қосуға арнайы келген делегация мүшелері қазыналы аймақтағы барша тұрғындардың ыстық сәлемін астаналықтарға жеткізді. Ал, халықаралық көрмеде бір аптаға жуық өз өнерлерін паш етіп жатқан оңтүстік өнерпаздары делегация мүшелерін құшақ жая қарсы алды. Оның ішінде,»Нұр Отан» Партиясы ОҚОФ төрағасының бірінші орынбасары Нұрмахан Жолдасов елден жеткен керуен мүшелеріне алғысын білдірді.
«ЭКСПО-2017» Халықаралық көрмесіне кірген бойда алғашқы танысу нысаны Қазақстанның «Нұр әлем» павильоны болды. Ондағы озық технологиялар мен заманауи құрылғылар келушілерді таң тамаша етті.
Мұнан кейін, автокеруен мүшелері Оңтүстік Қазақстан облысының Астана қаласындағы күндері аясында «Этноауылда» ұйымдастырылған шараларды көрді.
Мұнан кейін, «Ұлы дала автокеруені» «Қазанат» атшабарында ұлттық ат спорты түрлерінен ұйымдастырылған жарысты тамашалады. Атшабарға жиналған қауым аударыспақ, қыз қуу, жамбы ату, теңге ілу, құсбегілік және ат үстінде жігіттердің өнерін көрді.
Бұдан бөлек, жасөспрімдер мен жастар арасында асық атудан, жастар және ересектер арасында тоғызқұмалақтан, көрермендар арасында салмағы 35 келі болатын қошқар көтеру сайыстары өтті. Қошқарды иығына салып 28 көтерген Бердіқұл Əлфарабиға тең келер ешкім болмады. Теңге алудан Мағжан Сапарбеков жүлдегер атанды.
Жарыс қорытындысына сай жеңімпаздарға қаржылай сыйлықтарды «Нұр Отан» Партиясы ОҚОФ төрағасының бірінші орынбасары Нұрмахан Жолдасов пен ОҚО Қоғамдық кеңесінің мүшесі, ОҚО мәслихатының депутаты Дулат Әбіштер марапаттады.
«Айғақ-ақпарат».
