«Қазақстан жаңа жаһандық нақты ахуалда: өсім, реформалар, даму». Бұл — Елбасының Қазақстан Халқына арнаған кезекті Жолдауы. Астанадағы Тәуелсіздік сарайында ел зиялылары мен билік эшалонының кіл мықтылары – Елбасы Нұрсұлтан Назарбаевтың Жолдауын тыңдап қана қоймай, ауқымды жобалары мен ел дамуының мақсат-міндеттерін айқындады. Бүгінгі ахуал — біздің жетістіктерімізді сынға салып, елдігімізді шыңдай түсетін кез екендігін айрықша мәлімдеген Қазақстан Президенті Нұрсұлтан Назарбаев барша қоғам ел игілігі үшін аянбай тер төгу қажеттігін атап өтті.
Жаңа жылдан бастап жалақы, шәкіртақы, жәрдемақы 30 пайызға көбейеді. ҚР Президенті Нұрсұлтан Назарбаевтың Қазақстан халқына арнаған кезекті Жолдауында айтылған осы бір жағымды жаңалықты Шымкент қаласының тұрғындары аса қуанышты көңіл-күйде қабыл алды. Қала әкімдігінің үлкен мәжіліс залында жиналған қала активі, мәслихат депутаттары, ардагерлер кеңесінің мүшелері мен жастар қауымы ҚР Президентінің кезекті Жолдауын онлайн режимінде тікелей эфирде тамашалады. Бір жарым сағат уақыт ішінде Президенттің ел Үкіметінің алдына қойған негізгі міндеттерін ыждағаттылықпен тыңдаған қала тұрғындары ондағы көтерілген экономикалық-әлеуметтік мәселелерге бірауыздан қолдайтынын жеткізіп жатты.
Елбасының Қазақстан Халқына арнаған Жолдауын курстастары да тыңдады. КСРО Мемлекеттік сыйлығының лауреаты, Шымкент қаласының «Құрметті азаматы» Аманәлі Әбдіраманов Қазақстан Президенті Нұрсұлтан Назарбаевтың әрбір сөзін телеэкран арқылы жіберген емес. Міне, бүгін де ел экономикасы мен әлеуетін айқындап қана қоймай, нақты тапсырмалар мен міндеттерді жүктейтін құжаттың әрбір тармағын үзбей тыңдады. «Жаңа жылдан бастап Ұлт жоспары аясында қабылданған жаңа заңдар іске қосылады. Еліміздің болашағы үшін баршамызға үлкен жауапкершілік жүктеліп отыр. Бұл қазақстандықтардың заман үдерісіне сай әрекет етуін көрсетпек. Ал, техника ғылымдарының докторы, профессор, академик, ҚР техника және білім саласына еңбек сіңірген қайраткері, бірнеше ғылыми жаңалықтың авторы Қайрат Исламқұлов Елбасының жыл сайынғы Жолдауы әрбір қазақстандыққа күш-жігер беріп қана қоймай, қажыр-қайратын еселей түседі дейді. Жаңаша көзқарас, тынбай еңбек ету, мұқият тыңдау, нақты шешімге келу, мұның барлығы бүгіннен болашаққа деген нақты жоспарларды айқындай түспек. Сол себептен ел үшін маңызды мұндай сәтте Нұрсұлтан Назарбаевтың Халқына арнаған Жолдауын тыңдап, Оңтүстік жұртшылығына, өзі сабақ беретін оқу орнының студенттеріне мәні мен маңызын жеткізеді. Егемен елдің ертеңгі ұрпағы бүгінгі аға буынның тәлімді тәрбиесінен деп біледі.
Елбасының халыққа арнаған кезекті жолдауы білім саласының қызметкерлері тарапынан да үлкен қолдауға ие болды. Облыстық мәслихаттың депутаты Саттар Қуашбаев бастаған «Болашақ» колледжінің ұжымы саяси құжатты баяндау барысын тамашалаған болатын. Ағарту ісінің мамандары мемлекет басшысының сөзіне сәйкес, жаһандық дағдарыс кезеңінде экономикалық тұрғыда үнем жасай отырып, елдің дамуына ықпал жасау қажет деп есептейді.
Салтанат Тойболова
