Шымкенттік жас ақындар республикалық айтыста топ жарып, қала мерейін асқақтатты. Қазақстан Республикасы Оқу-ағарту министрлігіне қарасты «Дарын» республикалық ғылыми-практикалық орталығы ұйымдастырған «Жыр алыбы – Жамбыл» республикалық оқушылар айтысында Қаратау дәстүрлі өнер мектебінің шәкірттері жоғары нәтиже көрсетті.
Ұлттық сөз өнерін ұлықтаған додада Біржанұлы Исламәли бас жүлдені иеленсе, Бақтияр Айша ІІ орынға лайық деп танылды. Жас жүйріктер суырыпсалмалық қабілетімен, ұтқыр ойымен және сөз саптау шеберлігімен ерекшеленіп, қазылар алқасының жоғары бағасына ие болды.
Айтыс – қазақ халқының рухани мұрасы, ұрпақтан ұрпаққа жалғасып келе жатқан бірегей өнер. Ол жас ақындардың тіл байлығын, дүниетанымын, тапқырлығы мен ой ұшқырлығын шыңдайды. Сондықтан оқушылар арасында мұндай шығармашылық сайыстарды ұйымдастыру ұлттық құндылықтарды дәріптеп, жас таланттардың танылуына жол ашады.
Шымкенттік шәкірттердің жетістігі – олардың үздіксіз ізденісі мен ұстаздарының кәсіби еңбегінің нәтижесі. Сонымен қатар бұл жеңіс қаладағы қосымша білім беру ұйымдарында дәстүрлі өнерді дамытуға, жас ұрпақтың шығармашылық әлеуетін арттыруға бағытталған жұмыстардың маңызын айқындайды.
Жас ақындардың республикалық деңгейдегі жеңісі – ұлттық өнердің болашағына деген сенімнің көрінісі. Сөз қадірін түсініп, жырды жанына серік еткен өрендердің жетістігі қазақ айтысының жаңа буынмен толығып келе жатқанын аңғартады.
