19 КӘСІПОРЫНҒА АЙЫППҰЛ САЛЫНДЫ

Шымкентте кәсіпорындардың қоршаған ортаға әсері бақылауға алынып, заң талаптарының сақталуы жіті тексерілуде. Биыл тоғыз айда 37 тексеру жүргізіліп, анықталған заңбұзушылықтар үшін мекемелерге 505 миллион теңге айыппұл салынған. Ал арнайы құрылған топ «Шымкентцемент» зауытына барып, зиянды қалдықтардың ауаға таралуын болдырмау бағытындағы жұмыстарды бағамдады.

Қаладағы экологиялық ахуалға қатысты мәселелер кезектен тыс өткен мәслихат сессияларында да көтерілген. Нәтижесінде арнайы жұмыс тобы жасақталып, өндіріс орындарының қызметін зерделеу қолға алынды. Экология департаментінің мәліметінше, биылғы тоғыз айда 37 тексеру жүргізілген. Оның 18-і профилактикалық бақылау болса, 19-ы азаматтардың арыз-шағымдары негізінде ұйымдастырылған. Тексеру нәтижесінде жалпы сомасы 505 миллион теңге айыппұл салынған.

Арнайы топ «Шымкентцемент» зауытының өндірістік үдерісімен танысты. 2010 жылдан бері жұмыс істеп келе жатқан кәсіпорын жылына екі миллион тонна цемент өндіреді. Зауыт өкілдерінің айтуынша, өндірісте пайдаланылатын шикізаттың барлығы Қазақстаннан жеткізіледі. Бұған дейін әлеуметтік желіде кәсіпорыннан түтін шыққаны туралы ақпарат тараған еді. Мекеме өкілдері сол жағдайдан кейін тиісті алдын алу шаралары жүргізіліп, мәселе жедел ретке кеотірілген.

Өндіріс кезінде шаңның таралуын азайту үшін зауыт аумағында қосымша су бүрку жүйелерін орнату жұмыстары жүргізіліп жатыр. Кәсіпорын өкілдері алдағы уақытта 50 мың түп ағаш отырғызып, көгалдандыруға үлес қосуды жоспарлауда. Жұмыс тобының зерделеуіне жергілікті тұрғындар да қатысып, өндіріс барысы туралы ақпарат алды. Олар өздері танысқан мәліметтерді елді мекен тұрғындарына жеткізуге ниетті. Алдағы уақытта қаладағы өзге де кәсіпорындардың экологиялық жағдайы кезең-кезеңімен тексеріледі.