ЛАМИНАТ ӨНДІРЕТІН ЗАМАНАУИ ЗАУЫТ

«Turan» арнайы экономикалық аймағында импортты алмастыруға бағытталған тағы бір ірі өндіріс орны іске қосылды. «Qaz Natural Laminat» ЖШС-нің заманауи ламинат зауыты өңірдің өнеркәсіптік әлеуетін арттырып, құрылыс материалдары нарығын отандық өніммен қамтамасыз етуге мүмкіндік береді. Жобаның жалпы құны – 5 миллиард теңге, ал алғашқы кезеңде 65 жаңа жұмыс орны ашылды. Болашақта кәсіпорын өндіріс көлемін ұлғайтып, өнімін Орталық Азия елдеріне экспорттауды жоспарлауда.

Жаңа зауыттың ашылу салтанатына Түркістан облысының әкімі Нұралхан Көшеров қатысты. Аймақ басшысы Мемлекет басшысының экономиканы әртараптандыру, өңдеу өнеркәсібін дамыту және импортты алмастыру жөніндегі тапсырмасы өңірде жүйелі жүзеге асып жатқанын атап өтті. Рухани астанада бүгінде жалпы құны 280 миллиард теңгені құрайтын 39 инвестициялық жоба іске асырылып жатыр. Ал ламинат зауыты – сол жобалардың нақты нәтижесінің бірі.

Кәсіпорын басшысы Луо Ионг жобаның жүзеге асуына қолдау көрсеткен Үкімет пен Түркістан облысының әкімдігіне алғысын білдірді. Алдағы уақытта өндіріс көлемі кезең-кезеңімен ұлғайтылып, экспорт географиясы кеңейтілмек. Жаңа зауыт Түркістан облысының өндірістік әлеуетін күшейтіп қана қоймай, өңірдің экспорттық мүмкіндігін арттыруға да серпін береді. Жобаның жалпы құны 5 миллиард теңгені құрайды. Кәсіпорын жылына 840 мың шаршы метрге дейін ламинат өндіруге қауқарлы. Алғашқы кезеңде 65 адам тұрақты жұмыспен қамтылса, өндірістің екінші кезеңі толық іске қосылғанда бұл көрсеткіш 150 жұмыс орнына дейін ұлғаяды. Заманауи технологиямен жабдықталған зауыт халықаралық стандарттарға сай сапалы өнім шығаруға бағытталған.