ТҰРАНДА ЖОЛ МӘСЕЛЕСІ 100 % ШЕШІЛДІ

Тұран ауданында инженерлік инфрақұрылым шешім тапты деуге болады. Тек табиғи газ бен кәріз жүйесін қоспағанда.  Аудан басшысы бұл 2027 жылдың еншісінде тұр дейді. Құрсай, Жаңаталап және Айкөл шағын аудандары табиғи газ жүйесіне нақты қай уақытта қосылады?

Тұран ауданында бүгінде 22 шағын аудан бар. Жалпы 233 мыңға жуық тұрғын тұратын ауданда ауыз су мен электр энергиясымен қамту көрсеткіші 100 пайызға жеткен. Бұл туралы баспасөз брифингінде Тұран ауданының әкімі мәлімдеді. Дегенмен, ауданда кәріз жүйесі мен табиғи газбен қамту деңгейі әлі де төмен екені айтылды. 2026 жылы Тұран ауданында 81 көшеге асфальт төсеу жоспарланып, жалпы ұзындығы 48,05 шақырым болатын жол жөндеу жұмыстары жүргізілген. Бүгінде аталған жұмыстар толық аяқталып, тұрғындардың қатынауына қолайлы жағдай жасалған. Сонымен қатар, аудан көшелерін жарықтандыру жұмыстары да 100 пайызға жеткізілген. Жолдардың жөнделіп, көшелердің толық жарықтандырылуы ауданның ажарын айшықтап, тұрғындарға жайлы әрі қауіпсіз орта қалыптастыруға мүмкіндік берді. Баспасөз жиынында БАҚ өкілдері ауданға қатысты өзекті мәселелерді көтеріп, арнайы сауалдарын жолдады.

2026-2027 жылдары Тұран ауданында тұрғындардың демалысына қолайлы жағдай жасау мақсатында 5 жаңа гүлзар салу жоспарланып отыр. Атап айтқанда, гүлзарлар Мангелдин, Алтынжол, Қазығұрт және Арғымақ шағын аудандарында бой көтереді. Абаттандыру жұмыстары аясында жасыл желек көбейіп, тұрғындарға жайлы демалыс орындары қалыптасады. Жаңа гүлзарлардың салынуы ауданның көркін арттырып, көрікті әрі жайлы қоғамдық кеңістіктердің қатарын толықтыра түсетіні анық.