ЕКІ ӨНДІРІСТІК ЖОБА ІСКЕ ҚОСЫЛДЫ

 Шымкентте өндіріс саласы қарқын алып келеді. Еңбекші ауданында құны 15 миллиард теңгеден асатын екі бірдей инвестициялық жоба іске қосылды. Оның бірі – картон қаптама өндіретін зауыт болса, екіншісі – кәсіпкерлерге арналған жаңа өнеркәсіп аймағы. Ашылу рәсімдеріне қала әкімі Ғабит Сыздықбеков арнайы қатысты.«Оңтүстік» арнайы экономикалық аймағында «Shymkent Qagazy» серіктестігінің макулатураны қайта өңдеп, картон қаптама шығаратын жаңа өндіріс орны пайдалануға берілді. Ашылу рәсіміне қатысқан қала әкімі кәсіпорынды іске қосып, өндіріс барысымен танысты.Жалпы жоба қолданыстағы кәсіпорынды кеңейту аясында жүзеге асырылған.

Қазіргі таңда өндіріс ошағында құрылыс-монтаж жұмыстары толық аяқталып, заманауи технологиялық жабдықтар орнатылған. Құны 2,5 миллиард теңгені құрайтын жобаның басты мақсаты – еліміздің оңтүстік өңірлерін отандық сапалы картон қаптамасымен қамтамасыз ету. Алдағы уақытта зауыт жылына 10 мың тоннаға дейін өнім өндіре алады. Сонымен қатар мұнда 50 жаңа тұрақты жұмыс орны ашылған.

Бұдан кейін қала әкімі «Жұлдыз» индустриялық аймағында орналасқан жаңа өнеркәсіп алаңының ашылуына қатысты. «ORDA NS BUILDING» серіктестігі жүзеге асырған жоба шағын және орта бизнесті қолдауға бағытталған. Жаңа өндірістік аймақта кәсіпкерлерге дайын инфрақұрылымы бар өндірістік орындар ұсынылады. Бұл өз кезегінде жаңа кәсіпорындарды іске қосуды жеделдетіп, жұмыс істеп тұрған өндірістердің қуатын арттыруға мүмкіндік береді.
Жалпы жобаның жалпы құны 13 миллиард теңгені құрайды. Оның ішінде алғашқы кезеңге 8,3 миллиард теңге инвестиция тартылған. Мамандардың айтуынша, жаңа өнеркәсіп аймағы өндіріс көлемін ұлғайтып қана қоймай, өңірде жаңа жұмыс орындарының ашылуына да серпін береді.  Жалпы бұл жобалар өңірдің өндірістік әлеуетін арттырып, кәсіпкерлікті дамытуға және жаңа жұмыс орындарын құруға мүмкіндік береді.