Жаңа туған нәрестелердегі инсульт пен неврологиялық ауруларды ерте анықтау қаншалықты маңызды? Ал олардың салдарын азайту үшін қандай заманауи тәсілдер қолданылады? Осы және өзге де өзекті мәселелер Шымкентте өткен халықаралық деңгейдегі шеберлік сабағында талқыланды. Іс-шараға Польшадан келген білікті маман қатысып, қазақстандық дәрігерлермен тәжірибе алмасты.
Шымкент қалалық №2 ауруханасында «Неонаталдық командалық тәсіл: өмірдің алғашқы минуттарынан болашақ өмір сапасына дейін»тақырыбында дәрігерлер арасында мастер-класс өтті. Екі күнге созылған білім беру алаңына неонатологтар, балалар реаниматологтары, неврологтар және реабилитологтар жиналды. Бағдарлама аясында жаңа туған нәрестелердегі неврологиялық ауруларды диагностикалау, емдеу және оңалту мәселелері қарастырылды.
Шараның негізгі спикерлерінің бірі – Польшадан келген профессор, балалар неврологиясы саласының маманы Илона Копыта болды. Ол жаңа туған нәрестелердегі инсульт және балалардағы цереброваскулярлық аурулар тақырыбында дәріс оқып, халықаралық тәжірибемен бөлісті.
