Шымкентте Геология саласының майталманы Есеновты еске алды. Қазақтың көрнекті ғалымы, мемлекет және қоғам қайраткеріне биыл 100 жыл. Осыған орай өткен конференцияда геологиялық барлау саласының дамуы, заман талабына сай инновациялар мен болашақ жоспарлар бағдар жасалды. Шахмардан Есеновтің 100 жылдығына орай өткен тағылымды жиынға елдің геология саласының майталмандары жиналды. Конференцияға министрлік өкілдері, белгілі ғалымдар, еңбек сіңірген геологтар, академия мүшелері мен мұнай-газ саласының жетекші сарапшылары қатысты. Шарада ғалымның еңбек жолы кеңінен сөз болды. Қазақ ғылыми еңбек өндірісінің тарихында ерекше орын алар тұлға. Шахмардан Есенов совет тарихындағы ең жас министр болған. 33 жастағы Есенов 1961-65 жылдары ҚазССР геология министрі қызметін атқарды. Бүгінгі жиын дәл осы тұлғаға арналды. 
Ерен еңбек еткен ғалымның өмір жолын еске алып, келген көпшілікке арнайы видеоролик ұсынылды. Сондай-ақ, басқосуда сала мамандары мен ғалымдар Қазақстанның жер қойнауын зерттеудегі жаңа технологиялардың маңызына тоқталды. Геология ғылымының ел экономикасындағы стратегиялық рөлін ерекше атап өтті. Ауқымды басқосу геология саласындағы өзекті мәселелер талқыланған маңызды алаңға айналды. Жиында пайдалы қазбаларды іздеу мен барлаудың озық технологиялары сөз болып, Қазақстанның минералдық-шикізат қорын тиімді игеру мен саланы дамыту бағыттары кеңінен
қарастырылды.
