Нашақорлық індеті – оны жою міндеті. Жастардың зиянды затқа тәуелділігі әлі де алаңдатарлық деңгейде. Есірткі мәселесі қоғамда өзекті болып отыр. Жат әдеттің алдын алып, салауатты өмір салтын насихаттау мақсатында жастарға түсіндіру жұмыстары жүргізілді. Шаһардағы политехникалық колледжде ұйымдастырылған шара жайлы тілші материалында.
Өткен жылмен салыстырғанда есірткіге қатысты құқықбұзушылықтар саны біршама азайған. Алайда, бұл мәселе толық шешімін тапты деген сөз емес. Бүгінде есірткіні онлайн форматта таратып, тасымалдаумен айналысатындардың басым бөлігі — жастар. Бұл туралы сала мамандары мәлімдеді. Шараға колледж студенттері қатысты. Жастарға есірткінің зияны мен оның адам өміріне тигізетін кері әсері туралы кеңінен түсіндіру жұмыстары жүргізілді. Мамандар «оны бір рет қана тұтынамын» деп ойлаудың соңы тәуелділікке алып келетінін ескертті. Сондай-ақ, есірткіге қатысты заң бұзушылықтардың соңы 5 жылға дейін немесе өмір бойына бас бостандығынан айыру жазасына әкелуі мүмкін екені айтылды.
Жастар арасындағы нашақорлықтың алғашқы бастамасы көбіне темекі мен зиянды әдеттерден басталады. Сондықтан ерте жастан салауатты өмір салтын насихаттап, зиянды әрекеттерден аулақ болудың маңызын түсіндірген абзал. Осындай шаралар арқылы жастар арасында зиянды әдеттердің алдын алу басты назарға алынған. Мамандар мұндай кездесулердің жасөспірімдерге дұрыс бағыт-бағдар беріп, олардың болашағына оң әсер ететінін айтады.
