18 мамыр – Халықаралық музейлер күні. Айтулы датаға орай Шымкент қаласындағы бірқатар мәдени ошақтарда арнайы іс-шаралар ұйымдастырылды. Соның бірі – Хәкім Абай музейі. Рухани кеш барысында келушілерге концерттік бағдарлама ұсынылып, ұлы ақынның сурет көрмелерін көрсетті.Музейде ұлы ойшыл Абай Құнанбайұлының шығармашылық мұрасы кеңінен насихатталды. Жастар ақын өлеңдерін оқып, қара сөздерінен үзінділер келтірді. Көпшілік Абай мұрасын терең түсінген ұрпақтың рухани тұрғыда кемелденіп, қоғамда өз орнын таба алатынын атап өтті. Музейдің ашылуына себепкер болған белгілі абайтанушы ғалым Мекемтас Мырзахметұлының еңбегі де ерекше айтылды. Ғалымның Абай мұрасын зерттеу жолындағы ізденістері бүгінде жас буынға рухани бағыт беретін құндылыққа айналған.
Хәкім Абай музейі – Абай мұрасын дәріптеп, ұлттық руханиятты насихаттайтын мәдени орындардың бірі. Мұнда ақынның өмірі, шығармашылығы және қазақ әдебиетіне қосқан үлесіне қатысты құнды деректер жинақталған.
Кеш аясында Абай өлеңдерін жатқа білетін үлкенімен кішісі өлең оқып, әндерін орындады. Көрермендерге қолөнер және сурет көрмелері ұсынылып, музей қонақтары ұлттық мәдениетпен жақынырақ танысты.Музей мамандарының айтуынша, қазіргі цифрлық дәуірде мұндай рухани орталықтардың маңызы арта түскен. Себебі жастардың тарихи танымын кеңейтіп, ұлттық құндылықтарға деген қызығушылығын арттыру уақыт талабы.
