50 ОТБАСЫ ШЫҒЫСҚА ҚОНЫС АУДАРДЫ

Оңтүстіктен Шығыс өңіріне 50 адам қоныс аударуға ниетті. Сол мақсатта олар шырайлы Шығыстың тіршілігімен танысу үшін жолға шықты. Бүгінде «Ұлы көш» қоғамдық ұйымы арқылы өзге аймаққа қоныс аударғандарға 302 мың теңге көлемінде бір реттік төлем беріледі. Сондай-ақ, құны 7 млн теңгеге дейін баспана сатып алуға қаржылай көмек көрсетіледі.

Қоныс аударушыларға барлық жағдай жасалған. Нақтырақ айтқанда, баспана алуға 7 млн теңге көлемінде сертификат берілмек. Тіпті жеке кәсіп ашу үшін де мемлекет тарапынан 3 млн теңгелік арнайы гранттар қарастырылған. Шымкенттік Самат Тұрымбетов енді Шығыс Қазақстан облысының Алтай ауданы тұрғыны атанбақ. Мемлекеттің қолдауы арқылы ол отбасымен бірге жаңа мекенге табан тіремекші. «Жаңа орта – жаңа мүмкіндік» дегендей, қоныс аударушылар үшін бұл көш тек мекен ауыстыру емес. Алдағы уақытта жеке кәсібін ашып, оңынан дөңгелетуге зор мүмкіндік. Мемлекеттік бағдарламаның шарапатын тиімді қолданғысы келетіндердің бірі – жалғыз басты ана Әлия Тәуекел.

Ол ұлымен бірге жаңа өңірге қоныс аударып, жаңа өмір бастауға бел буып отыр. Бұл бағдарлама арқылы ағымдағы жылы 7 облыстан 2000 отбасы көшеді деп жоспарлануда. Қоныс аударушыларға көшу шығындары төленіп, баспанамен қамтуға, жұмысқа орналасуға және кәсіп бастауға қолдау көрсетіліп отыр. Бұл, өз кезегінде, көптеген отбасыға жаңа өңірде тамыр жайып, болашағын нықтауға жол ашпақ.