ҚАРИЯЛАРҒА ҚҰРМЕТ — ҰРПАҚҚА МІНДЕТ

Жеңіс мерекесі қарсаңында Белсенді ұзақ өмір орталығының қызметкерлері «Таза Қазақстан» акциясын ұйымдастырды. Бұл игі бастама тыл ардагерлерінің ауласын тазартудан басталды. Шара барысында орталық қызметкерлері ардагерлерге көмек көрсетіп, олардың үй маңын ретке келтірді. Кеңестік кезеңде майдангерлерге көмек көрсету үшін құрылған тимуровшылар секілді, Белсенді ұзақ өмір орталығының қызметкерлері тағы бір игі бастаманы жүзеге асырды. Бүгінде орталық қызметкерлері қарттардың үйіне арнайы барып, есік алдындағы аумақты тазалап, қамқорлықтарын көрсетті.

Ақ ниет пен шынайы ықыластың белгісі ретінде қарияларға сый-сияпат табысталып, жүрекжарды лебіздер айтылды. Сонымен қатар, әсем ән шырқалып, мерекелік көңіл күй сыйлады. Бұл шара тек тазалық жұмысы ғана емес, үлкенге деген құрмет пен жан жылуының айқын көрінісі. Осындай игі бастаманың ең үлкен жемісі – алғыс пен ақ батаның берілуі. Жалғыз басты қария Оңалбек Жақсыбай атқарылған жұмыстарға ризашылығын білдіріп, ақ тілегін жеткізді.

Ана – өмірдің шуағы. Бүгінгі таңда тоқсанның төрінен асқан ардақты апамыз – Арзан Сатыбалдиева. Ол өз сөзінде жастарға ақылын айтып, жүрекжарды лебізін білдірді. Осындай асыл аналардың ақ батасы – біз үшін ең қымбат қазына. Арзан апаның әрбір сөзі – өмірден түйген тағылым. Осындай игі шаралар арқылы қоғамда сыйластық пен жанашырлық нығая түседі. Үлкенге құрмет, кішіге ізет секілді ұлттың асыл құндылықтары кеңінен дәріптеліп, жас ұрпақтың бойына сіңеді. Мұндай бастамалар алдағы уақытта да жалғасын табады, дейді орталық қызметкерлері.