ЖӨНСІЗ ҚОЙЫЛҒАН ЖОЛ КЕДЕРГІЛЕРІ

Қоғамдық кеңес отырысы бұл жолы өткір сұрақтар мен өзекті мәселелерге толы болды. Жол қауіпсіздігі сынға алынып, рұқсатсыз орнатылған жол кедергісінің заңдылығы мен жаңа көшелердің сапасы қызу талқыланды. Жиын барысында тіл мәселесі де тыс қалмай, көшедегі жарнама атауларының қазақша болуы – қала мәдениетінің басты көрсеткіші екені айтылды.

 Жиында рұқсатсыз орнатылған жол кедергілері ең өзекті мәселелердің біріне айналды. Қоғамдық кеңес мүшелері жасанды жол кедергісінің қауіпсіздік талаптарына сай келмейтінін айтып, олардың заңдылығын қатаң тексеруді талап етті. Тиісті мекемелер бұл бағытта жұмыстар жүргізіліп жатқанын, кейбірі алынып тасталғанын жеткізді. Сонымен қатар, жаңа салынған көшелердің аз уақыт ішінде опырылып жатқаны тұрғындардың алаңдаушылығын күшейтті. Кеңес мүшелері бюджет қаржысының тиімді игерілуіне күмән келтіріп, жауапты басқармалардан нақты жауап пен бақылауды күшейтуді тапсырды.

Жиынның жалғасы мәдениет басқармасының есебі басталмай жатып-ақ қызу сұрақтармен өрбіді. Қоғамдық кеңес мүшелері көшедегі кәсіпкерлердің мекеме атауы мен жарнамаларды ілуде қазақ тілінің басымдығын сақтау қажеттігін айтты. «Қазақша жазу – қала мәдениетінің айнасы» екені ерекше айтылды. Кеңес барысында мәдениет саласы мен мемлекеттік тілдің қолдану аясын кеңейту мәселесі кеңінен талқыланды. Архив ісін жетілдіру және тарихи құндылықтарды сақтау бағытындағы жұмыстарға да назар аударылды. Қатысушылар бұл салаларды дамыту үшін жүйелі әрі нақты қадамдар қажет екенін алға тартты.