ЕЛДЕ КОНСТИТУЦИЯНЫҢ ЖАҢА МӘТІНІ ТАЛҚЫЛАНУДА

«Алдымызда елдің негізгі заңындағы жекелеген бөлімдерді түзету немесе толықтыру шеңберінен шығатын міндет тұр. Бұл 1995 жылғы Конституция мәтінін бүгінгі шындыққа жай ғана бейімдеу емес. Бұл – мемлекеттік құрылымның бүкіл архитектурасын, құқықтар мен бостандықтарға кепілдік беру жүйесін, билік институттары мен қоғамның өзара іс-қимыл тетіктерін терең қайта қарау. Осындай ауқымды өзгерістер фрагменттік түзетулер емес, жаңа мәтінді қабылдау қажеттілігіне әкеліп отыр. Бұл ұстаным Қазақстан Республикасының «Құқықтық актілер туралы» заңының 26-бабынан да туындайды. Аталған заңда нормативтік-құқықтық акті мәтінінің жартысынан астамына өзгерістер мен толықтырулар енгізілген жағдайда, оның жаңа редакциясы қабылдануы тиіс екені тікелей көрсетілген», – деді бейсенбі күні Конституциялық реформа жөніндегі комиссия отырысында Мәжіліс төрағасының орынбасары Дания Еспаева. Оның айтуынша, бүгінде комиссиядағы талқылаулар «қолданыстағы Конституция мәтініне әдеттегі түзетулер енгізу шеңберінен шығып отыр». «Комиссияға қолданыстағы нормалардың жартысынан астамын қамтитын 2 мыңнан астам ұсыныс келіп түсті. Әріптестердің, сарапшылардың және еліміздің азаматтарының барлық ұсыныстары маңызды әрі негізді, олардың логикасы мәнді, ал саны ауқымды», – деді Дания Еспаева.