МӘСЛИХАТТЫҢ 30-ШЫ СЕССИЯСЫ ӨТТІ

Шымкент қаласы мәслихатының 30-шы сессиясында қаланың әлеуметтік-экономикалық дамуына тікелей ықпал ететін маңызды мәселелер қаралды. Сессияда кәсіпкерлікті қолдау, салық саясатын жетілдіру, ономастика және тарихи нысандарды тиімді пайдалану бағытындағы бірқатар шешімдер қабылданды.

Жиын барысында қала әкімдігінде болған кадрлық ауыс-түйістер сөз болып, жаңа құрамға сәттілік тілегі айтылды. Сессия жұмысына қала әкімінің бірінші орынбасары Айдын Кәрімов қатысып, қабылданған шешімдердің мәні мен күтілетін нәтижелерге тоқталды. Ол кәсіпкерлікті қолдауға бағытталған бірқатар қадамдардың қаланың экономикалық белсенділігін арттыруға оң әсер ететінін жеткізді.

Президент Қасым-Жомарт Тоқаев Ұлттық Құрылтайда ономастика саласын тәртіпке келтіру керек деді. Сол тапсырма негізінде арнайы Жол картасы әзірленді. Ономастика құжаттарына біршама өзгерістер енгізілді. Тарихи тұлғалар тізімін толықтыру, елдімекендерге, көшелерге ат беру мәселесінде атқарылатын шаруа әлі де көп.Сессияда ономастика мәселелері де қаралды. Атаусыз көшелерге ұлттық мазмұны бар, халыққа жақын атаулар беру жөніндегі бастамалар қолдау тапты. Тарихи құндылығы бар ғимараттарды жалға беру бағаларын өзгеріссіз қалдыру жөніндегі шешім талқыланып, тарихи нысандардың сақтау мен тиімді пайдалану мәселесіне мән берілді.

Сессияда қабылданған шешімдер мегаполистің кәсіпкерлік әлеуетін күшейтіп, экономикалық өсімге жаңа мүмкіндік беретіні атап өтілді.Шымкент қаласы мәслихатының депутаттары 30-шы сессияда шағын бизнеске арналған жаңа арнайы салық режимі бойынша мөлшерлемені 2 пайызға дейін төмендету туралы ұсынысты бірауыздан қолдады. Бұл шешім 2026 жылы күшіне енетін жаңа Салық кодексі аясында қабылданды.
Депутаттар бастаманы қолдай отырып, салық мөлшерлемесін төмендету қала бюджетінің кіріс бөлігіне ықпал етуі мүмкін екенін атап өтті.