ЖАРАТЫЛЫСТАНУ ПӘНДЕРІН ОҚЫТУДАҒЫ ЗЕРТТЕУ ӘДІСТЕРІ з

№144 жалпы орта мектебінде жаратылыстану пәндерін оқытуға арналған республикалық ғылыми-тәжірибелік конференция өтті. Іс-шараны Әдістемелік орталық ұйымдастырды. Жиынға Астана, Шымкент қалалары мен бірнеше облыстан 300-ге жуық педагог, ғалым және білім саласының мамандары қатысты. Конференцияның басты мақсаты – жаратылыстану-математика бағытындағы білім сапасын арттыру. Сонымен бірге пән мұғалімдерінің оқыту мен тәрбие берудегі бірізділігін қамтамасыз ету. Жиында зерттеу әдістерін қолдану арқылы оқушылардың ғылыми сауаттылығын дамыту жолдары талқыланды. Педагогтер осы бағыттағы өзекті мәселелерді көтеріп, пәнді оқытудың тиімді тәсілдерін ұсынды.

Сондай-ақ, ғалымдар зерттеу әдістерінің қазіргі білім жүйесіндегі маңызын атап өтті. Бұл әдіс оқушыны сұрақ қоюға, талдау жасауға, тәжірибе арқылы білімді бекітуге үйретеді. Сарапшылар жаратылыстану пәндерінің мазмұнын зерттеу тәсілдерімен байланыстыру жаңа буынның ойлау қабілетін күшейтетінін айтты. Педагогтер практикалық шеберлік сағатында өздерінің озық тәжірибесін көрсетті. Жаратылыстану-математикалық бағыттағы жаңашыл әдістер, зертханалық тәжірибелер, интерактивті құралдарды қолдану, оқытудағы креативті тәсілдер көпшілік назарына ұсынылды. Бұл алаңда мұғалімдер өз идеяларын нақты мысалдармен дәлелдеп, тәжірибе жүзінде бөлісті.

Қатысушылар білім беру үдерісін жақсартуға бағытталған ойларын ортаға салды. Оқу мен тәрбиенің сапасын көтеру, мұғалімдердің кәсіби құзыретін арттыру, зерттеу әдістерін жүйелі қолдану жайы жан-жақты талданды. Әр өңірден келген педагогтер бір-бірімен әдістемелік тәжірибе алмасты. Жиын соңында білім беру үдерісіне енгізуге арналған ұсыныстар мен қорытынды резолюция қабылданды. Үздік баяндамалар іріктеліп, ғылыми-тәжірибелік материалдар жинақталды. Бұл жинақ педагогтердің кәсіби дамуына пайдалы ресурс болмақ.