265 ҮЙ ТАБИҒИ ГАЗҒА ҚОСЫЛДЫ

Қызылжар-2 шағынауданында жылдар бойы шешімін таппай келген инфрақұрылым мәселесі шешілді. Көктемде өткен көшпелі кездесуде тұрғындар ауыз су тапшылығы, газдың жоқтығын айтып, мәселені әкімдік назарына жеткізген болатын. Қала басшысының тапсырмасымен шағынауданға қажетті инженерлік желілер қысқа мерзімде тартылып, алғашқы кезеңнің жұмыстары аяқталды. Қазір 265 үй табиғи газға қосылды.

Қызылжар-2 тұрғындары көп жылдан бері ауыз су тапшылығын көріп, электр энергиясының тұрақсыздығынан қиындыққа ұшырап келген. Биыл көктемде өткен көшпелі кездесуде олар осы инфрақұрылым мәселесін ең өзекті проблема ретінде көтерді. Нәтижесі ретінде бүгінде Көлкент көшесіндегі үйлерге табиғи газ берілді. Тұрғындар бұл сәтті көптен бері асыға күткенін айтады. Олар үшін газдың қосылуы өмір сапасын айтарлықтай жақсартатын маңызды қадам болды.Жобаның бірінші кезеңінде ауыз су құбыры, электр желілері және газ инфрақұрылымы толық жүргізілді. Жаңартылған желілердің арқасында шағынауданда тұру әлдеқайда жайлы әрі қауіпсіз бола түсті. Қазір 265 үй үздіксіз ауыз сумен және электр қуатымен қамтылған. Сонымен қатар, табиғи газға қосылу мүмкіндігі де жасалды. Бұл инженерлік жүйелер тұрғындардың тұрмыс сапасын едәуір жақсартатыны сөзсіз.

Келесі жылы жобаның екінші кезеңі іске қосылып, Қызылжар-2 шағынауданы толықтай инфрақұрылыммен қамтылады. Бұл тұрғындардың барлық қажеттілігін өтеп, ауданның дамуына жаңа серпін береді. Сондай-ақ, қуанышты күнге қала әкімі Ғабит Сыздықбеков арнайы қптысып, тұрғындарды құттықтады. Шымкент қаласының әкімдігі жаңа шағынаудандарды инженерлік инфрақұрылыммен қамтуды басым бағыт ретінде жалғастырып келеді. Жыл соңына дейін Тасай мен Жаңаталапқа газ берілсе, қаланың газдандыру деңгейі 98 пайызға жетпек. 2026 жылы AGRES-5 атты жаңа жоба іске қосылып, сағатына 300 мың текше метр газ өндіре алатын қуатты станция жұмысын бастайды. Бұл қала бойынша табиғи газды 100 пайыз жеткізуге мүмкіндік береді.