АҚЫНҒА АРНАЛҒАН ШЫҒАРМАШЫЛЫҚ КЕШ

Шымкентте ақын, сазгер Несібелі Есенбекованың 75 жылдық мерейтойына арналған шығармашылық кеш өтті. Мерекелік жиында ақынның жырлары мен әндері орындалып, көрерменнің қошеміне бөленді. Рухани шара өнер мен поэзияны ұлықтаған әсерлі кешке айналды.

Үшінші мегаполисте  қазақтың талантты ақыны, сырлы сазгері, «Құрмет» орденінің иегері, Ордабасы ауданының құрметті азаматы Несібелі Есенбекованың мерейтойына арналған «Сәулелі жұмбақ жұлдыз шуағы» атты шығармашылық кеші өтті. Жиынға зиялы қауым өкілдері, өнер сүйер қауым мен ақынның ізбасарлары жиналды. Мерекелік шара ел руханиятының бай мұрасын дәріптеп, ұлттық өнердің мерейін көтерген күндердің біріне айналды. Ақынның өмір жолы мен шығармашылық еңбегі көпшілікке үлгі боларлық өнегелі өрнек.

Кеш барысында ақынның поэзиясы мен ән өнерінен сыр шертетін туындылар орындалды. Сазгер өз өнерін жастарға көрсетіп, табиғи дауыста ән шырқады. Ақынның жыр мен сазға толы туындылары жүрекке жылы әсер сыйлағаны сөзсіз. Мерекелік шара  көрермен көңілінен шығып, есте қаларлық сәтке айналды. Сондай-ақ, жиында Шымкент қалалық мәдениет, тілдерді дамыту басқармасы тарапынан ақынға арнайы сый-құрмет көрсетілді. Ақынның ұзақ жылдар бойы қазақ мәдениетіне қосқан өлшеусіз үлесі ерекше аталды.

Мерейлі кеш ақынның өнегелі өмірі мен өнерге адалдығын айшықтады. Оның қоржынында үш мыңға жуық туындысы бар Бұл – бір ғұмырдың еңбегі мен шабыттың жемісі.