ЖЕРГІЛІКТІ ҚАЛАМГЕРЛЕРМЕН РУХАНИ КЕЗДЕСУ

Шымкентте алғаш рет «Заман және қаламгер» атты ақын-жазушылардың жалпы жұртшылықпен шығармашылық кездесуі өтті. Шараның басты мақсаты – қаламгерлер мен оқырмандар арасындағы рухани байланысты нығайту. Сонымен қатар жергілікті авторлардың шығармашылығын кеңінен насихаттау.

Басқосу жас буынның әдебиетке деген қызығушылығын арттыруға бағытталған. Кездесуге Шымкент қаласы мәслихатының төрағасы Бахадыр Нарымбетов арнайы қатысып, руханият саласын қолдаудың маңыздылығына тоқталды. Оның сөзінше, әдебиет пен өнерді дамыту – қоғамның рухани тұтастығын нығайтудың басты тетігі.

Жиын барысында қаладағы белгілі қаламгерлердің жаңа туындылары таныстырылып, оқырман назарына ұсынылды. Бала кезден қаламды серік еткен Фатима Забырбекқызы өзінің жаңа кітабында ашаршылық жылдарының ауыр кезеңін бейнелегенін айтып, оқырманның шығарманы жүрекпен қабылдайтынына сенім білдірді.

Кездесу соңында қаланың әдеби өміріне елеулі үлес қосқан бірқатар ақын-жазушылар мәслихат төрағасының арнайы алғыс хаттарымен марапатталды. «Заман және қаламгер» жобасы алдағы уақытта дәстүрлі түрде ұйымдастырылып, Шымкенттің рухани өмірін байыта түспек.