ҚОҒАМНЫҢ ҚАУІПТІ ДЕРТІ

Есірткі мен құмар ойын – қоғамның ең өзекті әрі қауіпті дерті. Осыған орай қала жастары арасында тәуелділіктің алдын алуға бағытталған мобилографтар байқауы өтті. Байқау салауатты өмір салтын дәріптеу және жастардың әлеуметтік жауапкершілігін арттыру мақсатында ұйымдастырылған.

Шара барысында қатысушылар өздері түсірген бейнероликтер мен фотожұмыстар арқылы қоғамға ой салып, жастарды зиянды әдеттерден сақтануға шақырды. Әр туындыда тәуелділіктің адам өміріне, отбасына және қоғамға тигізер зардабы көрініс тапқан. Көрермендер жас авторлардың шығармашылық идеяларын ерекше ықыласпен қабылдады. Байқауға қаладағы жоғары оқу орындары мен колледждердің студенттері, еріктілер, сондай-ақ жас блогерлер қатысып, өз көзқарасын заманауи форматта жеткізді.

Кеш соңында үздік бейнеролик пен фотожұмыстардың авторлары марапатталып, ұйымдастырушылар тарапынан алғыс хаттар мен сыйлықтар табысталды. Сонымен қатар, қатысушылардың ең үздік туындылары әлеуметтік желілерде және ақпараттық платформаларда жарияланбақ. Мұндай жобалар қоғамның рухани иммунитетін нығайтып, жастардың өз болашағына жауапкершілікпен қарауына жол ашады. Ең бастысы — бүгінгі жастардың өнері мен ойы арқылы ертеңгі ұрпаққа салауатты өмір салтын ұстанудың үлгісі көрсетілуде.