Қазіргі заманның басты талабы – өндіріс саласында жаңа технологияларды тиімді пайдалану. Цифрлық жүйелер мен жасанды интеллектке негізделген шешімдер – өнеркәсіптің дамуын жаңа деңгейге көтеретін маңызды құрал. Осы мақсатта «QazIndustry» – индустрия және экспорт орталығының өкілдері Шымкент қаласына жұмыс сапарымен келді. Мамандардың негізгі мақсаты – өнеркәсіптік кәсіпорындарға цифрлық шешімдерді енгізуге жәрдемдесу, технологиялық жетілу деңгейін бағалау және отандық өндірісті жаңа сапалық деңгейге көтеру. Осы мақсатта орталық өкілдері Шымкент қаласына келіп, Bal Tekstil кілем фабрикасының жұмысымен танысты. Бұл кәсіпорын – еліміздегі тоқыма өнеркәсібінің ірі нысандарының бірі. Мұнда кілем өнімдері толық цикл бойынша өндіріледі. Фабрика басшылығы қазіргі таңда өндіріс үдерісіне жасанды интеллект элементтерін енгізу жөнінде келіссөздер жүргізіп жатыр.
QazIndustry мамандары фабриканың қазіргі жағдайына талдау жасап, кәсіпорынның цифрлық даму әлеуетін анықтайды. Арнайы дайындалған технологиялық ұсынымдарда өндіріс процесін жетілдіру жолдары мен жасанды интеллектіні енгізу бойынша нақты қадамдар көрсетілмек. Сонымен қатар, орталық өкілдері Түркістан облысындағы өзге де кәсіпорындарға барып, кәсіпкерлермен кездесулер өткізуді жоспарлап отыр. Кездесу барысында өнеркәсіптің цифрландыру бағыты, инновациялық шешімдерді енгізу және еңбек өнімділігін арттыру мәселелері талқыланады.
