ҚАУІПТІ АУРУЛАРДЫҢ АЛДЫН АЛУ ШАРАЛАРЫ

Биыл Шымкентте жануарлардан жарақат алған екі мыңнан астам адам медициналық көмекке жүгінген. Оның ішінде 14 жасқа дейінгі балалар саны 1343. Бұл Өткен жылдың осы кезеңімен салыстырғанда тұрақты. Қалада иесіз ит-мысықтарды аулау жұмыстары жалғасуда. Бұл туралы бүгін Шымкент қаласы бойынша санитарлық-эпидемиологиялық бақылау департаменті басшысының орынбасары Айгүл Тұрымбетова мәлімдеді.

Құтыру – жануардан адамға жұғатын және орталық нерв жүйесін зақымдайтын аса қауіпті жұқпалы ауру. Құтыруға шалдыққан жағдайда аурудың соңы өлімге әкеледі. Аурудың қоздырғышы ит, қасқыр, түлкі, қарсақ сияқты аңдар арқылы таралады. Құтырудан сақтанудың ең тиімді жолы — антирабикалық вакцина. Қала тұрғындарына құтыруға қарсы екпе тегін жүргізіледі. Мамандар күдікті жануарлардан балаларды аулақ ұстауға, ит-мысықты мал дәрігеріне тексертіп, дер кезінде вакцинациялауға шақырады.

Айгүл Тұрымбетованың айтуынша, маусымдық аурулардың бірі болып саналатын жіті респираторлық вирустық инфекциялар (ЖРВИ) мен тұмаудың жағдайы Шымкентте салыстырмалы түрде тұрақты.

ЖРВИ мен тұмау бір-біріне ұқсас вирус. Аурудың басты белгісі ол тыныс алу жолдарының зақымдануы, әлсіздік, мұрынның бітуі, тамақтың қышуы, 3-5 күннен астам уақыт дене қызуының 38-40°С жоғарылауы болып табылады.

 Айта өтейік, ЖРВИ/тұмаудың асқынуы вирусты және бактериалды пневмонияға, отит, гайморит, менингит, энцефалит, септикалық асқынуларға әкеліп соқтыруы мүмкін. Ал өте ауыр жағдайда жиі өліммен аяқталады дейді сала мамандары.