ӘЛЕМГЕ ТАНЫЛҒАН БАПКЕРДІҢ БОКС ЗАЛЫ АШЫЛДЫ

Шымкентте жаңа спорт залы ашылды. Ливерпульде өткен әлем чемпионатында бір үйден қос бірдей чемпион тәрбиелеген білікті жаттықтырушы жеке академиясын іске қосты. «Iliyas Boxing Academy» деп аталған бұл орталық бір мезетте 100 балаға дейін қабылдап, бокстың қыр-сырын үйретуге қауқарлы. Жаңа зал жас спортшылардың шеберлігін шыңдап, болашақ чемпиондарды тәрбиелеуге бағытталған.

ҚР еңбек сіңірген жаттықтырушысы Ильяс Зиятбекұлының жеке қаражатына салынған «Iliyas Boxing Academy» – ел игілігіне арналған маңызды жоба. Бұл спорт залы жас буынды тәрбиелеуге және спортқа баулуға бағытталған. Мұнда салауатты өмір салты насихатталып, кәсіби шеберлік шыңдалады. Жоба алдағы уақытта халықаралық деңгейдегі спортшыларды даярлауға мүмкіндік береді. Академияның басты мақсаты – спортқа ынтасы бар балаларға заманауи әрі жайлы жағдай жасау. Жас спортшылардың жан-жақты дамуына, олардың спорттық шеберліктерін арттыруға жол ашу. Бүгінде әлем чемпиондарын тәрбиелеген жаттықтырушының шәкірттері осы залда талмай жаттығып, көк туды биікте желбіретуге ниетті.

Жалпы аумағы 410 шаршы метрді құрайтын бұл спорт кешенінде барлық талаптарға сай жағдай жасалған. Академия 10 жастан асқан 100 балаға дейін қабылдай алады. Мұнда мамандар балалардың физикалық дайындығын ғана емес, сонымен қатар психологиялық тұрғыдан да жетілуіне сеп болады. Залдың ерекшелігі – мексикалық стильде дайындалғанында. Бұл стиль өз динамикасы, батылдығы және шабыттандыратын атмосферасымен ерекшеленеді. Академия алдағы уақытта тек қалалық емес, республикалық деңгейде де танымал спорт орталығына айналатыны сөзсіз.