Шымкент қаласында 35748 әскери бөлімінде мерзімді қызметін аяқтаған 140 сарбазды запасқа шығарып салу салтанаты өтті. Бұл – ел қорғаны болған жауынгерлердің ерен еңбегіне, табандылығы мен ерік-жігеріне көрсетілген зор құрметтің көрінісі. Бір жыл бойы Отан алдындағы борышын өтеген сарбаздар әскери, жауынгерлік және оқу-жаттығу дайындықтарында жоғары нәтижелерге қол жеткізіп, бөлім абыройын арттырды.
Салтанатты шара саптық алаңға жауынгерлік тудың енгізілуінен басталып, әскерилердің дәстүрлі рәсімдерімен өрбіді. Әскери бөлім командирінің міндетін уақытша атқарушы, подполковник Айдос Исаев сарбаздарға жылы лебізін білдіріп, олардың көрсеткен тәртібі мен батылдығын жоғары бағалады.
– Құрметті сарбаздар! Әскери қызмет кезінде танытқан табандылықтарыңыз бен жауапкершіліктеріңіз үшін алғыс айтамыз. Сіздер ел тыныштығы мен қауіпсіздігі жолында абыроймен қызмет еттіңіздер. Алдағы өмірлеріңізде де биік жетістіктер мен сәттілік серік болсын, – деді ол өз сөзінде.
Бір жылдық әскери өмір сарбаздарға ерік-жігер мен төзімділікті ғана емес, ұйымшылдық пен тәртіптің де мәнін ұқтырды. Қызмет барысында 5 сарбаз спорт шебері, 10 сарбаз бірінші дәрежелі және 15 сарбаз екінші дәрежелі спорт шебері атанды. Бұл – әскердегі спорттық дайындықтың жоғары деңгейін және сарбаздардың жан-жақты дамығанын дәлелдейді.
Сонымен қатар Құрлық әскерлерінің Бас қолбасшысының кезектен тыс тексеруінде шымкенттік сарбаздар жоғары баға алды. Көздеуіш оператор қатардағы Асылмұрат, оқшашар қатардағы Уринбеков, ефрейторлар Қайратұлы мен Ахметжан үздік нәтиже көрсетіп, бөлім намысын қорғады. Ал 2 шабуылдаушы ротаның 2 взводы «Оңтүстік» өңірлік қолбасшылығының тексерісінде «өте жақсы» деген бағаға ие болды.
Қазақстан Республикасының Конституциясының 36-бабының 1-тармағында: «Қазақстан Республикасын қорғау – оның әрбір азаматының қасиетті парызы» деп көрсетілген. Бұл қағиданы берік ұстанған жас сарбаздар ел алдындағы борышын абыроймен атқарып, нағыз патриоттық өнеге көрсетті.
Өткен аптада сондай-ақ, Шымкентте әскерге шақыру науқаны жалғасын тапты. Қалалық Қорғаныс істері жөніндегі департаменттің жинақ бекетінде жас сарбаздарды салтанатты түрде шығарып салу рәсімі өтті.
Бұған дейін 240 жас Отан алдындағы борышын өтеуге аттанған болса, бүгін олардың қатарына тағы 56 сарбаз қосылды. Олардың ішінде 21 жас — Қазақстан Республикасының Мемлекеттік күзет қызметінің Құрметті қарауыл ротасының әскери бөлімдерінде, ал 35 сарбаз — Талдықорған қаласындағы десанттық-шабуылдау әскерлерінің құрамында қызмет ететін болады.
Салтанатты іс-шараға қала әкімдігінің, Қорғаныс істері жөніндегі департаменттің өкілдері, ардагерлер мен сарбаздардың ата-аналары қатысты. Қатысушылар жас сарбаздарға адал қызмет, мықты денсаулық және ел қорғаны болу жолында табыс тіледі.
Шымкент қаласы бойынша “Ауғанстандағы соғыс ардагерлері мен мүгедектері кеңесінің” төрағасы Рыспеков Серғали Епишманұлы, ҚР Мемлекеттік күзет қызметінің өкілі капитан Көпбай Темірбеков, ҚР Қарулы Күштерінің 18404 әскери бөлімінің өкілі майор Нұрлан Толдыбаев және сарбаздың ата-анасы жас буынға ақ тілегін білдіріп, Отан алдындағы борышты абыроймен өтеуге шақырды.
Іс-шараның ресми бөлігі Қазақстан Республикасының Мемлекеттік Туын саптан шығару рәсімімен аяқталып, қатысушыларға арналған шағын концерттік бағдарлама ұсынылды.
Күзгі әскерге шақыру науқаны аясында Шымкент қаласынан барлығы 1500-ге жуық жас азамат мерзімді әскери қызметке аттанбақ. Бұл – елге қызмет етуге дайын жаңа буынның отансүйгіштік пен жауапкершілік рухының айқын көрінісі.
Әскери борыш – әрбір азаматтың елге деген адалдығын, ерлігін және жауапкершілігін айқындайтын өмір мектебі. Отан үшін қызмет ету – тек міндет емес, ұлттың болашағын қорғауға қосқан зор үлес.
