2026 ЖЫЛДАН БАСТАП ҚАЗАҚСТАНДА ЗЕЙНЕТАҚЫ МӨЛШЕРІ ӨСЕДІ

2026 жылдың 1 қаңтарынан бастап елімізде зейнетақы төлемдерінің мөлшері өседі. Бұл туралы Еңбек және халықты әлеуметтік қорғау министрлігі хабарлады.Министрліктің мәліметінше, Қазақстандағы зейнетақы жүйесі үш құрамдас бөліктен тұрады: ынтымақты, негізгі және жинақтаушы.

«Жас бойынша зейнетақы төлемі 1998 жылдың 1 қаңтарына дейін еңбек өтілі бар азаматтарға тағайындалады. Негізгі зейнетақы төлемі зейнет жасына жеткен барлық адамдарға беріледі және оның мөлшері адамның еңбек өтіліне байланысты – ең төмені өмір сүру минимумының 70%-ын, ең жоғарғысы 110%-ын құрайды. Ал жинақтаушы зейнетақы азаматтың жинаған қаржысына және зейнетақы жарнасы аударылған табыс көлеміне тәуелді», — делінген министрліктің ресми хабарламасында. Ведомство әлеуметтік кодекстің 197-бабына сәйкес, жас бойынша және еңбек сіңірген жылдары үшін төленетін зейнетақы жыл сайын республикалық бюджет туралы заңда бекітілген көлемде арттырылатынын еске салды.

«2026 жылғы 1 қаңтардан бастап жас бойынша төленетін зейнетақы мөлшерін 10 пайызға арттыру жоспарланып отыр. Негізгі зейнетақы да өмір сүру минимумының өзгеруіне байланысты ұлғайтылады», — деп мәлімдеді министрлік. Сонымен қатар, Бірыңғай жинақтаушы зейнетақы қорынан (БЖЗҚ) төленетін жинақтаушы зейнетақылар жыл сайын 5% мөлшерінде индекстеледі. Бұл өсім елдегі барлық зейнеткерлерге қатысты болады.

Мемлекет басшысының тапсырмасына сәйкес, негізгі зейнетақыны кезең-кезеңімен арттыру жұмысы жалғасып келеді. «2023 жылдан бастап бес жыл бойы негізгі зейнетақы жыл сайын өседі:
ең төменгі мөлшері – өмір сүру минимумының 70%-ына дейін,
ең жоғарысы – 120%-ға дейін. 2026 жылдың 1 қаңтарынан бастап негізгі зейнетақының ең жоғары мөлшері 110%-дан 118%-ға дейін көтеріледі», — делінген министрлік мәліметінде.

2026 жылғы индексациядан кейін:
• ең төменгі зейнетақы (негізгі бөлікті қоса) — 104 645 теңге,
• ең жоғары зейнетақы (негізгі бөлікті қоса) — 238 412 теңге болады.
Негізгі зейнетақының үлесі тиісінше 35 609 және 60 005 теңгені құрайды.

Министрліктің мәліметінше, 2026 жылға арналған зейнетақы төлемдері республикалық бюджеттің 2026–2028 жылдарға арналған жобасында қарастырылған. Қазіргі таңда бұл құжат Мәжілісте қаралу үстінде.

Бүгінгі таңда Қазақстанда зейнет жасы ерлер үшін – 63 жас, әйелдер үшін – 61 жас (2028 жылға дейін) болып белгіленген. «Министрлік зейнетақы заңнамасын жетілдіру бағытында тұрақты жұмыс жүргізіп келеді. Сарапшылармен бірлесіп, жаңа тәсілдерді қарастырып, халықаралық тәжірибені зерттеу жалғасуда», — деп атап өтті ведомство өкілдері.