ҚҰТҚАРУШЫЛАР ҚАМҚОРЛЫҒЫ
Жылыту маусымы қарсаңында Шымкент қаласы Төтенше жағдайлар департаменті әлеуметтік тұрғыдан осал отбасылардың үйлерін аралап, өрт қауіпсіздігі жөнінде түсіндірме жұмыстарын жүргізуде.
Осы шара аясында Тұран ауданы ТЖБ-ға қарасты мамандандырылған өрт сөндіру бөлімі қызметкерлері «Жаңаталап» тұрғын алабында алты баланы жалғыз өзі тәрбиелеп отырған ананы анықтады. Тұрмыстық жағдайдың қиын екенін көрген құтқарушылар бейжай қалмай, ҚР Төтенше жағдайлар министрлігінің 30 жылдығына арналған «30 игі іс» акциясы аясында нақты көмек көрсетті.
Қызметкерлер отбасының ескі есік-терезелерін жаңалап, балаларға жылы киім мен ойыншықтар тарту етті. Сондай-ақ қыс маусымына арналған екі айлық азық-түлік қорын жеткізіп берді.
Бұл игі іс — құтқарушылардың адам өмірін құтқарумен қатар, қоғамдағы әлеуметтік жауапкершілікті жоғары ұстайтын жандар екенін тағы бір мәрте дәлелдеді. Олардың мейірімі мен қамқорлығы қиын жағдайда қалған отбасыларға үлкен үміт пен жылулық сыйлады.
«ТАЗА ЖАҒАЛАУ» АКЦИЯСЫ ҚОЛДАУ ТАПТЫ
Қазақстан Республикасы Төтенше жағдайлар министрлігінің 30 жылдығына арналған «30 игі іс» республикалық акциясы аясында Шымкент қаласы ТЖД қызметкерлері қаланың экологиялық ахуалына үлес қосып, «Таза жағалау» акциясына белсенді қатысты.
Іс-шара барысында қаланың бастау көзі әрі табиғи символы саналатын Қошқар ата өзенінің арнасы мен жағалауы қоқыстан тазартылып, су айдынының экологиялық жағдайын жақсартуға бағытталған жұмыстар атқарылды.
Құтқарушылар тұрғындарды табиғатты аялауға, өзен-көлдеріміздің тазалығын сақтауға және қоршаған ортаға ұқыпты қарауға шақырды.
Экологиялық мәдениетті сақтау – әр азаматтың парызы. Табиғатты қорғау – болашақ ұрпақтың амандығы мен денсаулығына қосқан зор үлес.
Аталмыш акцияға байланысты өткен аптада тағы бір игі іс жүзеге асты.
Қазақстан Республикасы Төтенше жағдайлар министрлігінің 30 жылдығына орай және республикалық «30 игі іс» акциясы аясында мектеп оқушылары үшін №7 өрт сөндіру бөлімінде Ашық есік күні ұйымдастырылды.
Іс-шара барысында балалар құтқарушы мамандығының жауапты да маңызды қырларымен танысты. Мамандар оқушыларға қауіпсіздік ережелерін сақтау, төтенше жағдайда дұрыс әрекет ету, өрттің алдын алу тәсілдері туралы кеңінен түсіндірді.
Балаларға арнайы өрт сөндіру техникасы мен құрал-жабдықтар көрсетіліп, олардың қызметтік ерекшеліктері таныстырылды. Қатысушылар өздерін қызықтырған сұрақтарын қойып, құтқарушылармен еркін әңгімелесті.
Бұл бастама жас ұрпақтың қауіпсіздік саласындағы білімін арттырумен қатар, олардың жауапкершілік пен азаматтық сана-сезімін қалыптастыруға ықпал етті.
ЕРЕКШЕ БІЛІМ БЕРУ МЕКЕМЕСІНДЕ ҚАУІПСІЗДІК САБАҒЫ
Шымкент қаласында арнайы мектеп-интернатта тактикалық оқу-жаттығу өтті
«Қолжетімді қауіпсіздік» акциясы аясында Шымкент қаласы Төтенше жағдайлар департаментінің Азаматтық қорғаныс басқармасы мен Тұран ауданы ТЖБ қызметкерлері №1 арнайы мектеп-интернатында оқу-жаттығу өткізді.
Іс-шараға 200 оқушы мен 15 мұғалім қатысып, жер сілкінісі кезінде қауіпсіз іс-қимыл жасау тәртібін тәжірибеде пысықтады.
Ерекше білім беру мекемесінің ерекшелігін ескере отырып, ақпаратты түсіндіру үшін ым-ишара тілін меңгерген маман арнайы шақырылды. Бұл балаларға қауіпсіздік ережелерін барынша түсінікті және қолжетімді түрде жеткізуге мүмкіндік берді.
Оқу-жаттығу барысында оқушылар эвакуация дағдыларын меңгеріп, төтенше жағдай туындағанда дұрыс әрекет ету жолдарын үйренді.
Бұл іс-шараның басты мақсаты – қауіпсіздік мәдениетін қалыптастыру және балалар мен педагогтарды төтенше жағдайларға дайын болуға баулу.
Дәл осындай шара оқушыларға да арналды. Қазақстан Республикасы Төтенше жағдайлар министрлігінің 30 жылдығына арналған «30 игі іс» акциясы аясында Әл-Фараби ауданының №3 өрт сөндіру бөлімінің қызметкерлері мектеп оқушыларына арнап танымдық кездесу ұйымдастырды.
Іс-шара барысында балаларға құтқарушылардың күнделікті қызметі, арнайы техника мен жабдықтар таныстырылды. Сондай-ақ төтенше жағдай туындаған кезде дұрыс әрекет ету тәсілдері тәжірибе жүзінде көрсетілді.
Ашық есік күні оқушылар үшін әсерлі әрі пайдалы шара болды. Олар қауіпсіздік ережелерін меңгеріп, құтқарушы мамандығына деген қызығушылықтарын арттырды.
ЗАҢ ҮСТЕМДІГІ – ӘДІЛЕТТІҢ КЕПІЛІ
Шымкентте мемлекетке келтірілген 1,7 млн теңгеден астам шығын қайтарылды
Халықаралық іздеуде жүрген сотталушы 2024 жылдың шілде айында Грузия Республикасында ұсталып, Қазақстанға экстрадициялау барысында мемлекет бюджеті есебінен 1,7 млн теңгеден астам қаржы жұмсалған болатын.
Шымкент қаласының азаматтық істер жөніндегі ауданаралық соты Әл-Фараби ауданы прокуратурасының талап-арызын толық қанағаттандырып, шығынды өтеу жөнінде шешім шығарды.
Қазіргі таңда қозғалған атқарушылық іс жүргізу құжаты негізінде борышкерден барлық шығын толықтай өндіріліп, мемлекет пайдасына қайтарылды.
Бұл жағдай – прокуратура органдарының мемлекет мүддесін қорғаудағы табанды еңбегінің нақты нәтижесі. Шығынды толық өтеу заң үстемдігін қамтамасыз етумен қатар, әділет принциптерін сақтаудың айқын үлгісі болып табылады.
Мемлекет қаржысының әрбір теңгесі – халық игілігі үшін. Оны қорғау – құқық қорғау органдарының басты міндеті.
АЗАМАТТЫҚ ҚОРҒАУ АРДАГЕРЛЕРІ СПОРТ АЛАҢЫНДА КЕЗДЕСТІ
Қазақстан Республикасы Төтенше жағдайлар органдарының 30 жылдығына орай Шымкент қаласы ТЖД «30 игі іс» акциясы аясында азаматтық қорғау ардагерлері арасында дәстүрлі спартакиада ұйымдастырылды.
Іс-шара спорттық рух пен құрметке толы мерекеге айналды. Спартакиада алдында ардагерлер үшін Ашық есік күні өткізілді. Онда қонақтарға заманауи өрт сөндіру және құтқару техникалары, арнайы құрал-жабдықтар таныстырылып, жеке құрамның кәсіби дайындығы көрсетілді. Шараға арнайы колледж студенттері де қатысып, азаматтық қорғау саласының қызметімен жақынырақ танысты.
Бағдарлама аясында шахмат және үстел теннисінен жарыстар ұйымдастырылды. Спорттық бәсекелер достық пен серіктестік рухында өтіп, ардагерлер үшін ерекше кездесуге айналды.
Ардагерлер өз сөздерінде қызмет жылдарындағы қызықты естеліктерімен бөлісіп, азаматтық қорғау жүйесінің даму деңгейіне жоғары баға берді. Сондай-ақ ұйымдастырушыларға көрсетілген құрмет пен жылы қабылдау үшін ризашылықтарын білдірді.
