ЗАҢ ҮСТЕМДІГІ – ҚОҒАМ ҚАУІПСІЗДІГІНІҢ КЕПІЛІ
Шымкентте аса ірі мөлшерде есірткі өсірген тұрғын ұсталды. Шымкент қаласында есірткі қылмысына қарсы іс-қимыл шеңберінде жүргізілген жедел іс-шара барысында аса ірі көлемде сора өсірген азамат қолға түсті.
2025 жылғы 4 қыркүйекте Абай ауданы аумағында профилактикалық жұмыстар кезінде Темірлан тас жолының бойындағы егістік жерден 112 килограмм марихуана тәркіленді. Айғақ заттар жиналып, күдікті ұсталды.
Аталған дерек бойынша Қазақстан Республикасы Қылмыстық кодексінің 300-бабы 3-бөлігінің 2) тармағына сәйкес сотқа дейінгі тергеп-тексеру басталды. Бұл баппен 12 жылға дейін бас бостандығынан айыру жазасы қарастырылған.
Есірткі бизнесіне қарсы күресте прокуратура мен құқық қорғау органдарының үйлесімді жұмысы қоғамды қауіпті құбылыстан қорғаудың негізгі тетігі болып отыр. Прокурорлардың заң үстемдігін қамтамасыз етудегі қатаң бақылауы – тергеу сапасына, айыпталушының әділ жазасын алуына және қылмыстың түбірімен жойылуына ықпал етуде.
Бұл оқиға – тек құқық қорғау органдарының табанды еңбегінің нәтижесі ғана емес, сонымен қатар қоғамға ескерту. Есірткі қылмысына төзбеушілік пен заң талаптарын мүлтіксіз орындау – елдің болашағы мен жас ұрпақтың амандығын қорғаудың басты жолы.
ИНВЕСТИЦИЯНЫ ҚОРҒАУ – ДАМУДЫҢ КЕПІЛІ
Қаратау ауданының прокуроры ірі инвесторлармен кездесті
Мемлекет басшысының инвестициялық жобаларды сүйемелдеу жөніндегі тапсырмасын орындау мақсатында Қаратау ауданының прокуроры Ғалымжан Жаңабаев «Тассай» индустриалды аймағындағы ұлттық пулға енгізілген ірі инвесторлармен кездесті.
Кездесу барысында прокурор құны 1 млрд теңгеден асатын мырышталған құбыр өндіру жобасын іске асырып жатқан «BS Group» ЖШС-нің және құны 1,8 млрд теңгеден асатын биофармацевтикалық зауытты жүзеге асырып жатқан «Anda Company» ЖШС-нің қызметімен танысты.
Прокурор кәсіпкерлік субъектілерінің құқықтарын қорғау – прокуратураның басты назарында екенін атап өтті. Ол инвесторларға құқықтық қолдау көрсетілетінін, заңнамалық нормалар мен стандарттардың сақталуына жәрдемдесу мақсатында тұрақты жұмыс жүргізілетінін жеткізді.
Мұндай кездесулердің маңызы зор: инвестордың құқығын қорғау – ел экономикасына сенімді капитал тартудың алғышарты. Прокуратураның ашықтығы мен құқықтық қолдауы іскерлік ортада сенімді нығайтып, өңірдің экономикалық әлеуетін арттыруға ықпал етеді.
Сонымен бірге, кәсіпкерлер өзекті мәселелер туындаған жағдайда +77076150010 байланыс нөміріне немесе Шымкент қаласы, Ерімбетов көшесі, 304 «Г», «Заңғар» бизнес орталығындағы Фронт-офиске жұмыс күндері сағат 09:00-ден 19:00-ге дейін хабарласа алады.
БАЛАЛАРДЫҢ БОЛАШАҒЫ – ҚОҒАМНЫҢ ОРТАҚ ЖАУАПКЕРШІЛІГІ
Шымкент қаласының прокуратурасы ата-аналармен онлайн кеңес өткізді. Шымкент қаласының прокуратурасы «Zoom» платформасы арқылы қаладағы 162 мемлекеттік және 135 жеке мектептің ата-аналар комитеті төрағаларының қатысуымен кеңес өткізді. Онлайн шараға 5 мыңнан астам ата-ана қосылды.
Кеңесте кәмелетке толмағандар арасындағы құқық бұзушылықтардың алдын алу, балалардың бос уақытын тиімді ұйымдастыру мәселелері талқыланып, ата-аналарға нақты түсіндірмелер берілді.
Қала прокуратурасы ата-аналарды балаларымен тығыз қарым-қатынас орнатып, олардың бос уақытын жүйелі бақылауда ұстауға шақырды.
– Құқық бұзушылықтың алдын алу тек құқық қорғау органдарының ғана емес, бүкіл қоғамның ортақ міндеті. Әрбір ата-ана өз баласының тәрбиесіне жауапкершілікпен қарауы тиіс, – деп атап өтті жиынға қатысушылар.
Мектеп, ата-ана және құқық қорғау органдарының бірлескен жұмысы – балалардың қауіпсіздігі мен салауатты болашағын қамтамасыз етудің басты тетігі.
Балаларымыздың амандығы – бәріміздің ортақ қамқорлығымыз.
ЗАҢ ҮСТЕМДІГІ – ӘДІЛЕТТІҢ КЕПІЛІ
Шымкентте мемлекетке келтірілген 1,7 млн теңгеден астам шығын қайтарылды
Халықаралық іздеуде жүрген сотталушы 2024 жылдың шілде айында Грузия Республикасында ұсталып, Қазақстанға экстрадициялау барысында мемлекет бюджеті есебінен 1,7 млн теңгеден астам қаржы жұмсалған болатын.
Шымкент қаласының азаматтық істер жөніндегі ауданаралық соты Әл-Фараби ауданы прокуратурасының талап-арызын толық қанағаттандырып, шығынды өтеу жөнінде шешім шығарды.
Қазіргі таңда қозғалған атқарушылық іс жүргізу құжаты негізінде борышкерден барлық шығын толықтай өндіріліп, мемлекет пайдасына қайтарылды.
Бұл жағдай – прокуратура органдарының мемлекет мүддесін қорғаудағы табанды еңбегінің нақты нәтижесі. Шығынды толық өтеу заң үстемдігін қамтамасыз етумен қатар, әділет принциптерін сақтаудың айқын үлгісі болып табылады.
Мемлекет қаржысының әрбір теңгесі – халық игілігі үшін. Оны қорғау – құқық қорғау органдарының басты міндеті.
