ДРОППЕРЛЕРДІҢ ҚАУПІ ЖӘНЕ ЗАҢ АЛДЫНДАҒЫ ЖАУАПКЕРШІЛІК
Шымкент қаласы полиция департаментінің қызметкерлері киберқылмысқа қарсы жүргізілген арнайы іс-шара барысында Шымкент, Алматы және Алматы облысында интернет-алаяқтықпен айналысқан қылмыстық топтың әрекетін әшкереледі.
Тексеру барысында күдіктілердің интернет-алаяқтықтың 9 жайтына қатысы бар екені анықталды. Жәбірленушілерге келтірілген жалпы материалдық шығын 141 миллион теңгеден асты.
Қылмыстық топтың құрамында: ұйымдастырушы, дропперлерді тартумен айналысқан екі дроповод және қолма-қол ақшаны алып, ұйымдастырушыға жеткізген тасымалдаушы болған. Барлығы қолға түсті. Қазіргі таңда тергеу амалдары жалғасып, олардың басқа да қылмыстарға қатыстылығы тексерілуде.
Бұл іс-шара қалалық прокуратураның үйлестіруімен өткізілді.
Дроппер дегеніміз не? Дроппер – алаяқтардың атынан банк картасын ашып беретін немесе өзінің шотын заңсыз ақша аударымдарына пайдалануға келісетін адам. Мұндай тұлғалар қылмыстық жолмен алынған қаражатты заңдастыруға көмектеседі.
Дропперлердің әрекеті:
- Қоғамға қаржылық қауіп төндіреді;
- Жәбірленушілердің мүлкіне зиян келтіреді;
- Банк жүйесінің тұрақтылығына сызат түсіреді;
- Өздерін де қылмыстық жауапкершілікке алып келеді.
Бұл қылмысты әшкерелеу – қазақстандық полиция қызметкерлерінің кәсібилігін, қырағылығын және заңды қорғаудағы батылдығын айқын көрсетті. Полицияның басты міндеті – азаматтардың қауіпсіздігін қамтамасыз ету.
Шымкент полицейлері заманауи технологияларды пайдалана отырып, интернеттегі қылмыстық схемаларды дер кезінде тоқтатып, халықтың сенімін нығайтуда.
ХАЛЫҚТЫҢ ЦИФРЛЫҚ ӘДЕТІНЕ САЙ: ШЫМКЕНТТЕ «УЧАСКЕ» ІС-ШАРАСЫ ЖАЛҒАСУДА
Шымкент қаласында учаскелік полиция инспекторлары тұрғындармен жедел әрі ашық байланыс орнату үшін заманауи коммуникациялық арналарды кеңінен қолданып келеді. Енді тұрғындар мессенджердегі ортақ чаттар арқылы қоғамдық тәртіпке қатысты бұзушылықтарды бірден хабарлай алады.
Бұл бастама «Учаске» жедел-профилактикалық іс-шарасы аясында жүзеге асырылып, өз тиімділігін көрсетуде.
Цифрлық байланыс – жедел шешім. Мәселен, көпқабатты үйдің тұрғыны чатқа ауладағы тұрмыстық қалдық контейнерлеріне құрылыс қоқысының заңсыз тасталғаны туралы жазба қалдырған. Учаскелік инспектор дереу әрекет етіп, құқық бұзушыны анықтады.
Нәтижесінде:
- Азаматқа заңға сәйкес әкімшілік хаттама толтырылды;
- Қоқыс арнайы орынға шығарылды;
- Тәртіп сақшыларының жылдам әрі әділ әрекеті тұрғындардың ризашылығын тудырды.
Халық сенімі – полиция абыройы. Шымкент полицейлері жаңа технологияларды күнделікті қызметте тиімді пайдаланып, тұрғындардың сеніміне ие болып келеді. Мұндай шаралар:
- құқық бұзушылықтардың алдын алуға;
- халықпен тығыз байланыс орнатуға;
- қоғамда «Заң мен Тәртіп» қағидатын орнықтыруға ықпал етуде.
Аталған жоба аясында тәртіп сақшылары түсіндіру жұмыстарын жүргізіп, құқықтық мәдениетті нығайтуға күш салуда. Бұл – полицияның қоғамға жақындығын арттырып, азаматтардың қауіпсіздігін қамтамасыз етудегі маңызды қадамы.
