ТҰРАНДАҒЫ ТАЗАЛЫҚ

20 қыркүйек – Дүниежүзілік тазалық күні. Бұл күні әрбір қалада, ауданда, тіпті аулаларда кең көлемді тазалық акциялары ұйымдастырылды. Соның бірі үшінші мегаполисте өтті. Тұран ауданында ұйымдастырылған ауқымды сенбілікте қоршаған ортаның тазалығы басты назарға алынды.Мемлекет басшысының бастамасымен қолға алынған «Таза Қазақстан» акциясы аясында ұйымдастырылған Тұран ауданындағы тазалық жұмысына аудан әкімі аппараты, басқарма басшылары, жоғары оқу орындарының студенттері, қоғам белсенділері, коммуналдық қызметкерлер мен қала тұрғындары атсалысты. Байтұрсынов көшесінің бойында өткен жалпы қалалық сенбілікке 700-ге жуық адам мен 30-ға тарта техника жұмылдырылды.Тазалық акциясына Мұхтар Әуезов атындағы университеттің 500-ге жуық студенті қатысты. Бүгінде әрбір жастың қоршаған ортаны таза ұстауға деген белсенділігі артып келеді.

 Шараға қатысушылардың айтуынша, мұндай сенбіліктер тек бір күндік емес, тұрақты түрде ұйымдастырылуы тиіс. Дүниежүзілік тазалық күні аясында өткен сенбілік қала тазалығын жақсартумен қатар, тұрғындардың табиғатқа деген жауапкершілігін арттырады. Ұйымдастырушылар мұндай шаралар алдағы уақытта да жалғасын табатынын айтады.