МАРАФОНҒА 7 МЫҢҒА ЖУЫҚ АДАМ ҚАТЫСТЫ

    Шаһарда «Шымкент марафон – 2025» атты спорттық жарыс өтті. Ауқымды шара «ПетроҚазақстан» компаниясының 40 жылдық мерейтойына орай ұйымдастырылған. Бұқаралық жүгіру сайысына жеңіске деген жігерін көрсеткен 7 мыңға жуық адам қатысты.

Биыл да марафон аясында бірнеше қашықтық бойынша сайыстар өтті. Атап айтқанда, 5, 10, 21 және 42 шақырымдық жарыстар мен скандинавиялық жүрістен эстафетада жеңімпаздары анықталды. Ауқымды іс-шараға Шымкент қаласы әкімдігі мен қалалық дене шынықтыру және спорт басқармасы ұйытқы болды. Ал құрметті демеуші ретінде «ПетроҚазақстан» компаниясы қолдау көрсетті.

Аталмыш Шарада барлық қауіпсіздік талаптары сақталған. Бұл Жүгіру марафоны Әл-Фараби алаңынан басталып, сол жерде өз мәресіне жетті.
Сондай-ақ спорттық шараға петроқазақстан компаниясынан бөлек 6 демеуші қолдау білдірген.
Шымкент марафоны жыл өткен сайын ауқымын кеңейтіп келеді. Бұл тек кәсіби спортшылардың ғана емес, салауатты өмір салтын қолдайтын әрбір тұрғын мен спорт жанкүйерлерінің басын қосатын айтулы шараға айналды. Биылғы жарысқа «ПетроҚазақстан» компаниясының қызметкерлері де белсенді қатысып, өз үлестерін қосты. Сондай-ақ марафонға Франция, Өзбекстан және Қырғызстаннан келген қатысушылар да қосылды.

Бұқаралық жүгіру сайысында үздік шыққан жеңімпаздар мен жүлдегерлер марапаттан тыс қалған жоқ. Оларға ақшалай сыйлықтармен қатар демеушілер ұсынған бағалы тартулар табыс етілді. Әрбір қатысушы үшін бұл марафон тек спорттық дода ғана емес, салауатты өмір салтын дәріптеудің, ерік-жігерді шыңдаудың және бірлік пен ынтымақтың мерекесі болды.