ЖАСЫЛ ЭКОНОМИКАНЫ ДАМЫТУ МӘСЕЛЕЛЕРІ ТАЛҚЫЛАНДЫ

М.Әуезов атындағы Оңтүстік Қазақстан зерттеу университетінде «Таза Қазақстан» экологиялық акциясы аясында «Энергия тұтынуды азайту және жаңартылатын көздерге көшу» тақырыбында дөңгелек үстел өтті. Кездесуде өңірдегі энергетика саласындағы өзекті мәселелер мен жаңартылатын энергия көздеріне көшу жолдары талқыланды. Сондай-ақ, энергияны тиімді тұтыну мен биогаз қондырғыларын енгізу жайлы ғылыми-техникалық ұсыныстар айтылды.

Бұл жұмыстардың барлығы қоршаған ортаны сақтау, табиғи ресурстарды үнемдеу, көмірқышқыл газының шығарылуын азайту және энергия қауіпсіздігін қамтамасыз етуді көздейді. Жиынға «Оңтүстік Жарық Транзит», «Азия Трафо», «Шардара ГЭС», «3-Энергоорталық», GASYR Energy Construction» секілді жетекші кәсіпорындардың мамандары қатысты. Олар өз мекемелеріндегі энергияны үнемдеу мен жаңартылатын көздерге көшу бағытында атқарылып жатқан жұмыстар туралы баяндап, өз тәжірибелерімен бөлісті. Айта кетерлігі – олардың барлығы осы университеттің түлегі. Университеттің «Ақпараттық технология және энергетика» жоғары мектебінің ғалымдары мен жас зерттеушілері де жаңартылатын энергия саласындағы ғылыми зерттеулерімен бөлісті.

Бұл жиын өңірдегі энергетика саласындағы түйткілдерді шешуге бағытталған, өндіріс пен ғылымды байланыстырып, болашақ мамандарға үлкен мүмкіндік беретін пайдалы кездесу болды. Бүгінгі кездесуде жасыл энергетиканы дамыту мәселелері кеңінен талқыланып, жаңартылатын энергия көздерін тиімді пайдалану мен инновациялық жобаларды жүзеге асырудың маңыздылығы айқындалды Бұл бағыттағы бірлескен жұмыс – «Таза Қазақстан» бағдарламасының негізгі бағыттарының бірі – жасыл энергетиканы дамытуға нақты үлес қосқан маңызды қадам болды.