ЖАҢА КОМЬЮНИТИ ОРТАЛЫҚ АШЫЛДЫ

«Достық үйінде» жаңа комьюнити орталығы салтанатты түрде ашылды. Мегаполистен бой көтерген  орталыққа 7 млн теңге қаржы кеткен. Бұл Мемлекет басшысының Қазақстан халқы Ассамблеясының XXXIII сессиясында берген тапсырмалары аясында жүзеге асқан маңызды жоба. Комьюнити орталық — этносаралық келісімді күшейтуге, қоғамдық бірлікті нығайтуға, түрлі бастамалар мен жобаларды қолдауға, сондай-ақ мемлекеттік тілді дамытуға арналған заманауи кеңістік.  Мұнда этномәдени бірлестіктердің өкілдері, «Ассамблея жастары» ұйымының мүшелері мен қалалық ҚХА жанындағы қоғамдық құрылымдар бас қосып, ел бірлігін арттыруға бағытталған жобалар әзірлеп, кеңес өткізуге және түрлі іс-шаралар ұйымдастыруға мүмкіндік алады.

            Орталықтың ашылу рәсіміне Шымкент қаласы әкімінің орынбасары, қалалық ҚХА төрағасының орынбасары сондай-ақ «Ассамблея жастары» белсенді қатысты. Салтанатты шара барысында қатысушылар жаңа орталықтың лентасын қиып, этнографиялық жеке коллекциялар мен өнер туындылары қойылған көрмені тамашалады. Сондай-ақ, толықтай жабдықталған заманауи орталықтың мүмкіндіктерімен танысып, алдағы жоспарларды пысықтады. Қала әкімінің орынбасары өз сөзінде орталықтың жастар арасындағы қоғамдық белсенділікті арттырудағы маңызына тоқталды. Кездесу барысында жастар бұл кеңістікті шығармашылық, зияткерлік және әлеуметтік жобалар үшін тиімді платформа ретінде пайдалануға ниетті екендерін жеткезді. Жиын соңында мемлекет және қоғам қайраткері, қалалық ҚХА жанындағы Ақсақалдар кеңесінің төрағасы Орынбай Рахманбердиев қатысушыларға ақ батасын берді.

Сонымен қатар, шара аясында қала әкімінің орынбасары жастармен арнайы кездесу өткізіп, Мемлекет басшысының Жолдауында айтылған басым бағыттарға тоқталды. Бүгінде мегаполисте 400 мыңнан аса жас бар. Ол жастардың заман талабына сай даму қажеттігін атап өтті. Ия, қазіргі таңда жасанды интеллект пен жаңа технологияларды меңгеру – уақыттың маңызды талабы болып отыр.